21 مامىر, 10:16 275 0 الەۋمەت انار لەپەسوۆا

4 ايدا 586 مىڭعا جۋىق قازاقستاندىققا ااك تولەندى

قازاقستاندا قاڭتار-ءساۋىر ايلارىندا 113 مىڭ وتباسىدان 586 مىڭعا جۋىق ادامعا جالپى سوماسى 19,6 ملرد تەڭگەگە اتاۋلى الەۋمەتتىك كومەك تاعايىندالدى جانە تولەندى.

بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.

586 مىڭ ادامنىڭ 561 مىڭى توتەنشە جاعداي كەزىندە مەملەكەتتىك ينستانتسيالارعا جۇگىنبەي، II توقساندا ااك-ءتى اۆتوماتتى تۇردە الدى، ال 25 مىڭ ادام ااك الۋ ءۇشىن العاش رەت جۇگىندى.

جاردەماقى ەڭ الدىمەن قۇرامى، تۇرعىلىقتى مەكەنجايى جانە تابىس دەڭگەيى وزگەرمەگەن وتباسىلارعا تاعايىندالدى. ول ءۇشىن اقپاراتتىق جۇيەلەردەن الۋشىلاردىڭ دەرەكتەرىن تەكسەرۋ جۇزەگە اسىرىلدى، اتاپ ايتقاندا، تۇرعىلىقتى جەرى بويىنشا تىركەلۋى، جىلجىمايتىن مۇلكىنىڭ، كولىگىنىڭ بولۋى، كىرىستەرى جانە باسقاسى تەكسەرىلدى. بارلىق اقپارات پەن حابارلامالار ەلەكتروندىق پوشتا جانە مەسسەندجەرلەر ارقىلى جىبەرىلدى.

ااك كورسەتۋدىڭ جاڭا تەتىكتەرى شەڭبەرىندە تابىسى از وتباسىلارداعى بالالاردى قولداۋعا ەرەكشە كوڭىل بولىنەتىنىن، ولارعا كەپىلدىك بەرىلگەن الەۋمەتتىك توپتاما ەنگىزىلگەنىن اتاپ وتكەن ءجون.

كەپىلدىك بەرىلگەن الەۋمەتتىك توپتاما جاس ساناتتارى بويىنشا 2 تۇرگە بولىنەدى: 1-دەن 6 جاسقا دەيىنگى جانە 6-دان 18 جاسقا دەيىنگى بالالارعا ارنالعان. 1 جاستان 6 جاسقا دەيىنگى بالالار ءۇشىن ازىق-تۇلىك جانە تۇرمىستىق حيميا زاتتارىنىڭ جيىنتىعى قاراستىرىلعان.

ازىق-تۇلىك جيىنتىعىنا ءتۇرلى جارمالار، پيۋرە، شىرىندار، ءسۇت جانە ت. ب. كىرەدى. تۇرمىستىق حيميا جيناعى ءتىس پاستاسىن، بالاعا ارنالعان ششەتكانى، كىر جۋاتىن ۇنتاقتى، شارۋاشىلىق جانە ءيىس سابىندى جانە ت.ب. قامتيدى، ول توقسانىنا 1 رەت ۇسىنىلادى.

6 جاستان 18 جاسقا دەيىنگى بالالارعا مەكتەپتە تەگىن تاماق بەرىلەدى، قوعامدىق كولىكتە وقۋ ورنىنا دەيىن جەڭىلدىكپەن جول جۇرەدى، مەكتەپ فورماسىمەن جانە مەكتەپ كەرەك-جاراقتارىمەن جىلىنا 1 رەت قامتاماسىز ەتىلەدى.

سوڭعى جاڭالىقتار