19 مامىر, 17:55 1536 0 جاڭالىقتار اسىل تۇمار

اياگوزدەگى ءتورت بالانىڭ ءولىمى: مينيسترلىك ارنايى تەكسەرۋ جۇرگىزبەك

سۋرەت عالامتوردان الىندى
سۋرەت عالامتوردان الىندى

قر ەڭبەك جانە حالىقتى الەۋمەتتىك قورعاۋ مينيسترلىگى 113 مەديتسينالىق-الەۋمەتتىك مەكەمەگە ءجىتى تەكسەرۋ جۇرگىزۋ جايلى باستاما كوتەردى. جوسپاردان تىس تەكسەرۋگە اياگوزدەگى ارنايى الەۋمەتتىك كومەك ورتالىعىندا ءتورت تاربيەلەنۋشىنىڭ كوز جۇمۋى سەبەپ بولىپ وتىر، – دەپ جازدى قازاقپارات.

ەستەرىڭىزگە سالا كەتسەك، وسىعان دەيىن اياگوزدەگى الەۋمەتتىك كومەك ورتالىعىندا 4 بالانىڭ قايتىس بولعاندىعى جايلى حابارلانعان.

مينيسترلىكتىڭ ءباسپاسوز قىزمەتى ۇسىنعان مالىمەتكە سۇيەنسەك، ءبىرىنشى كەزەكتە تىرەك-قيمىل اپپاراتى بۇزىلعان بالالاردى وڭالتاتىن ارنايى الەۋمەتتىك قىزمەت كورسەتۋ ورتالىقتارىنا، سونداي-اق پسيحونەۆرولوگيالىق اۋرۋلارى بار بالالارعا ارنالعان ورتالىقتارعا تەكسەرۋ جۇرگىزىلمەك.

تەكسەرۋ مەديتسينالىق-الەۋمەتتىك قىزمەتتەردى كورسەتۋگە قويىلاتىن بارلىق تالاپتاردىڭ ساقتالۋىنا جانە سول مەكەمەلەردەگى بالالاردىڭ تۇرمىستىق جاعدايىنا بايلانىستى بولادى.

بۇگىندە قازاقستاندا مۇگەدەك بالالارعا ارنالعان 20 مەملەكەتتىك وڭالتۋ ورتالىعى جۇمىس ىستەيدى، وندا 1,8 مىڭنان استام بالا تۇرىپ جاتىر.

بارلىق 113 مەديتسينالىق-الەۋمەتتىك مەكەمەدە كەشەندى تەكسەرۋ جۇرگىزىلمەك. ونىڭ ىشىندە:

  • 178 ادام قامتىلعان 4 تىرەك-قيمىل اپپاراتى بۇزىلعان بالالارعا الەۋمەتتىك قىزمەت كورسەتۋ ورتالىعى;
  • 168 ادامدى قامتيتىن پسيحولوگيالىق پاتولوگياسى بار بالالارعا ارنالعان 16 الەۋمەتتىك قىزمەت كورسەتۋ ورتالىعى;
  • 8 364 ادام تۇرىپ جاتقان قارتتار مەن مۇگەدەكتەرگە ارنالعان 45 الەۋمەتتىك قىزمەت كورسەتۋ ورتالىعى;
  • 14 160 ادامعا ارنالعان 48 پسيحونەۆرولوگيالىق الەۋمەتتىك قىزمەت كورسەتۋ ورتالىعى بار.

جالپى الەۋمەتتىك قىزمەت كورسەتۋ ورتالىقتارىندا 24 مىڭنان استام ادام تۇرۋدا. اتالمىش مەكەمەلەر جەرگىلىكتى اتقارۋشى ورگانداردىڭ قاراماعىندا.

سوڭعى جاڭالىقتار