28 ناۋرىز, 10:57 365 0 جاڭالىقتار اسىل تۇمار

كارانتين كەزىندە مادەني شارالاردى ونلاين كورە الاسىز

جامبىل وبلىسىنداعى مادەني مەكەمەلەر ونلاين رەجيمدە جۇمىس ىستەۋدە.

وبلىس اكىمىنىڭ ءباسپاسوز قىزمەتى مەملەكەت باسشىسىنىڭ كوروناۆيرۋستىڭ الدىن الۋ شارالارىن كۇشەيتۋ بويىنشا جاساعان مالىمدەمەسىنە ساي جامبىل وبلىسىنداعى مادەنيەت جانە ونەر مەكەمەلەرىندە قوعامدىق مادەني ءىس-شارالار ۋاقىتشا توقتاتىلعانىن ايتادى.

دەگەنمەن، مادەني مەكەمەلەر ونلاين رەجيمىندە ءارتۇرلى باعىتتا جۇمىستارىن جالعاستىرىپ، الەۋمەتتىك جەلىلەردە (Facebook, Instagram, zhambylmadeniet.kz) اتقارىلىپ جاتقان شارالارىن جاريالاۋدا. ولاردىڭ ىشىندە ۆيرتۋالدى مۋزەي، ونلاين ەكسكۋرسيالار،بەينە-سپەكتاكل، ونلاين-كونتسەرتتەر وتكىزىلۋدە.

اتاپ ايتساق، جۋىردا جەرگىلىكتى ءانشى جاندوس وماروۆ كورەرمەنسىز، قاشىقتان ونلاين تەلەۆيزيالىق فورماتتا كونتسەرت بەرسە، فيلارمونيا انشىلەرىنىڭ ءان-شاشۋى، بارلىق شىعارماشىلىق ۇجىمنىڭ ءارتىس، ءانشى، بيشىلەرىنىڭ ءۇي رەجيمىندە شىعارماشىلىق جۇمىسى، ۇيىرمە جەتەكشىلەردىڭ ونلاين قابىلداۋى ۇيىمداستىرىلعان.

سونداي-اق، 17 ناۋرىزدان باستاپ د.قوناەۆ اتىنداعى جامبىل وبلىستىق بالالار مەن جاسوسپىرىمدەر كىتاپحاناسى «ونلاين كىتاپحانا» رەجيمىندە وقىرماندارعا قىزمەت كورسەتۋدە.

ال، وبلىستىق ورىس دراما تەاترى ءوز سپەكتاكلدەرىن بەينەجازبا ارقىلى كورەرمەنگە ۇسىنۋدا. بۇگىنگە دەيىن گ. فيگەيرەدونىڭ «دون جۋان»، د.ءفونۆيزيننىڭ «جەتەسىز جەتكىنشەك» كومەديالارىن، شىڭعىس ايتماتوۆتىڭ شىعارمالارى جەلىسىندە ساحنالانعان «نايمان انا»، «تەڭىز جاعالاي جۇگىرگەن تارعىل توبەت» درامالارى الەۋمەتتىك جەلى جانە يۋتۋب-كانال ارقىلى كوپشىلىك نازارىنا ۇسىنىلعان.

بۇدان بولەك، وزەكتى تاقىرىپتاردا تاعىلىمدى بەينەروليكتەر جانە ناۋرىز مەرەكەسىنە وراي الدىن الا ازىرلەنگەن ارنايى كومپازيتسيالىق كورىنىستەر جۇكتەلگەن.

تەاتر باسشىسى اقىلدوس تاجيەۆتىڭ ايتۋىنشا، بۇل باعىتتاعى جۇمىستار الداعى ۋاقىتتا ءوز جالعاسىن تاپپاق.

ايتا كەتۋ كەرەك، بۇل مەكەمەلەردىڭ بارىندە زالالسىزداندىرۋ جۇمىسى جۇرگىزىلىپ، ارنايى دەزينفەكتسيالىق قۇرالدارمەن قامتاماسىز ەتىلگەن.

سوڭعى جاڭالىقتار