27 ناۋرىز, 21:15 1269 0 الەۋمەت انار لەپەسوۆا

ەل تۇرعىندارى بانكتەرگە بەرەشەگىن قالاي وتەيدى – مينيستر ءتۇسىندىردى

توتەنشە جاعداي رەجيمىنە بايلانىستى ەلىمىزدە تابىس كوزىنەن ايرىلعان ازاماتتاردىڭ نەسيە تولەمدەرى 3 ايعا شەگەرىلەدى. اقپارات جانە قوعامدىق دامۋ ءمينيسترى داۋرەن اباەۆ مۇنداي جەڭىلدىكتى كىمدەر پايدالانا الاتىنىن جانە ازاماتتاردىڭ بانككە بەرەشەگى قالاي وتەلەتىنىن ءتۇسىندىردى. 

قازىرگى ۋاقىتتا قارجى نارىعىن رەتتەۋ جانە دامىتۋ اگەنتتىگى، قازاقستان قارجىگەرلەرىنىڭ قاۋىمداستىعى، ەكىنشى دەڭگەيلى بانكتەر مەن ميكروقارجى ۇيىمدارى حالىقتى قولداۋ بويىنشا ءتيىستى شارالاردى ازىرلەپ، بەكىتتى.

«وسىلايشا، قارىز الۋشىلار ءۇشىن تولەم مەرزىمى 2020 جىلدىڭ 16 ناۋرىزى مەن 15 ماۋسىمى ارالىعىندا كەيىنگە شەگەرىلەدى. قارىز بويىنشا تولەمدەردى كەيىنگە شەگەرۋ مۇمكىندىگى وسىعان مۇقتاج ادامدارعا بەرىلمەك. ماسەلەن، كارانتيننىڭ ەنگىزىلۋى سەبەپتى جۇمىسىنان ايرىلعاندار، اقى تولەنبەيتىن ەڭبەك دەمالىسىنا شىققاندار، جالاقىسى قىسقارعاندار نەمەسە توقتاتىلعاندار جانە ت.ب. وزدەرىڭىز تۇسىنگەندەي، نەگىزدەمەلەردىڭ باسىم كوپشىلىگى توتەنشە جاعداي رەجيمىنە قاتىستى بولماق»، – دەدى مينيستر «حابار 24» تەلەارناسىنىڭ تىكەلەي ەفيرىندە.

قوسىمشا قۇجاتتارسىز بۇل شەگەرۋ شاراسى رەسمي تۇردە تىركەلگەن جۇمىسسىزدارعا، ااك الۋشىلار جانە حالىقتىڭ الەۋمەتتىك ءالجۋاز توپتارىنا قاتىستى قولدانىلادى.

سونىمەن بىرگە، نەسيەلىك ۇيىمدار اتالعان تۇلعالاردىڭ تىزىمدەرىن كرەديتتىك بيۋرولاردان الادى. بۇل شارا كاسىپكەرلەرگە دە قاتىستى بولادى.مىسالى، تاۋار ساتىلىمى مەن كورسەتىلەتىن قىزمەت كولەمى ازايۋى سەبەپتى قارجىلىق جاعدايى ناشارلاعان، تۇتىنۋشىلار تولەمى كەشىككەن جانە ت.ب. سەبەپتەرمەن كاسىپكەرلەر تولەمدەرىن كەيىنگە شەگەرۋ مۇمكىندىگىن الا الادى.

سوڭعى جاڭالىقتار