27 ناۋرىز, 16:28 1428 0 قاۋىپسىزدىك انار لەپەسوۆا

قاۋىپتى كەزەڭدە ەسكەرتۋلەرگە قاراماستان 435 مىڭ قازاقستاندىق شەتەلگە اتتانعان

سىرتقى ىستەر مينيسترلىگىنىڭ رەسمي وكىلى ايبەك سمادياروۆ الەمدى ىندەت جايلاعان ۋاقىتتا شەت مەملەكەتتەردە قيىن جاعدايدا قالعان قازاقستان ازاماتتارى جايلى ايتىپ بەردى.  

رەسمي وكىلدىڭ Tengrinews.kz پورتالىنا بەرگەن مالىمەتىنە سۇيەنسەك، 27 اقپان مەن 23 ناۋرىز ارالىعىندا 435 مىڭ قازاقستاندىق شەكارا اسىپ كەتكەن.

«27 اقپاندا سىرتقى ىستەر مينيسترلىگى ازاماتتارعا ۇندەۋ جاساپ، كوروناۆيرۋسقا بايلانىستى قاۋىپتىلىگى جوعارى مەملەكەتتەرگە بارماۋعا، مۇمكىندىگىنشە شەتەلدىك ساپارلاردى كەيىنگە قالدىرۋعا كەڭەس بەردى. ۇندەۋدە تۋريزم سالاسىندا قىزمەت ەتەتىن ۇيىمدارعا دا جۇگىنىپ، ءوز تۇتىنۋشىلارى مەن سەرىكتەستەرىنە تۋريستىك، ىسكەرلىك جانە باسقا دا ماقساتتارمەن شەتەلگە شىعۋدى شەكتەۋ قاجەتتىگىن ءتۇسىندىرۋدى وتىندىك»، – دەيدى  ايبەك سمادياروۆ.

كەسەل جۇقتىرۋ قاۋپى ەسكەرتىلگەنىنە قاراماستان، قازاقستاندىقتار شەتەلگە شىعۋدى توقتاتپاعان.

قاۋىپتى كەزەڭدە شەكارا اسقانداردىڭ كوپشىلىگى تۋريستەر ءجيى باراتىن مەملەكەتتەرگە دەمالۋعا بارعان. ماسەلەن، مىسىرعا 5616 ادام، ءباا-گە – 6778, تۇركياعا -8327, تايلاندقا -1342, مالديۆ ارالدارىنا 487 ادام اتتانعان.  سونداي-اق، مەكسيكا، بۋركينا-فاسو، برازيليا سەكىلدى ەلدەرگە ساياحاتتاعان وتانداستارىمىز دا بار.

ايتا كەتەيىك، بۇعان دەيىن ۋكراينادان 76 قازاقستاندىق ەلگە ورالعانىن حابارلاعانبىز. 

سوڭعى جاڭالىقتار