26 ناۋرىز 2020, 11:21 1414 0 ءبىلىم ارايلىم بيمەنديەۆا

ونلاين وقىتۋ – ءماجبۇرلى شارا

مەملەكەت باسشىسىنىڭ تاپسىرماسى بويىنشا COVID-19 ۆيرۋسىنىڭ الدىن الۋ ماقساتىندا بىرقاتار شۇعىل شارالار قولعا الىندى. وسى ورايدا قازاقستاننىڭ جوعارى وقۋ ورىندارى مەن كوللەدجدەرى 16 ناۋرىزدان باستاپ قاشىقتىقتان وقىتۋ تۇرىنە كوشكەنى بەلگىلى. 

ءبىلىم جانە عىلىم ءمينيسترى اسحات اي­ماعامبەتوۆ ەلىمىزدەگى جوعارى وقۋ ورىندارى مەن كوللەدجدەر قاشىقتىقتان وقىتۋعا دايىن ەكەنىن ايتقان بولاتىن. «قا­شىق­تىق­تان وقىتۋعا قازاقستانداعى جوعارى وقۋ ورىن­دارىنىڭ قاۋقارى جەتەدى. ءبىزدىڭ ۋني­ۆەرسيتەتتەردىڭ كوپشىلىگى ۇلكەن قالالاردا ور­نالاسقان. سول سەبەپتى ستۋدەنتتەردى قا­شىق­تىقتان وقىتۋعا تەحنيكالىق ءمۇم­كىن­دىك بار جانە ينتەرنەتتىڭ جىلدامدىعى دا جەتكىلىكتى. ءبىز 1,5-2 اي بۇرىن جۇمىس توبىن قۇ­رىپ، وسى ماسەلەنى قولعا الدىق. جوعارى وقۋ ورىندارى مەن كوللەدجدەردە تەستىلەۋ جۇمىستارى ءجۇردى»، – دەدى مينيستر.

ەلىمىزدە العاش رەت جاپپاي قاشىق­تىق­تان وقىتۋعا كوشكەن جوو مەن كوللەدج­دەر­دىڭ اۋديتوريالارى قاڭىراپ بوس قالدى. وقىتۋشىلار دا قاشىقتىقتان جۇمىس ىستەۋ رە­جيمىنە اۋىسىپ، ەندىگى جەردە ستۋدەنت­تەر­دىڭ ساباق ۇلگەرىمىن تەك ۇيدە وتىرىپ كوم­پيۋ­تەر مەن سمارتفون ارقىلى تەكسەرە الا­دى.

جالپى ەلىمىز بويىنشا 2019 جىلعى 1 قاڭ­تاردان باستاپ سىرتتاي وقىتۋ توق­تا­تىلىپ، قاشىقتىقتان وقىتاتىن تەحنولوگيالار پايدالانىلا باستاعان بولاتىن. بۇگىندە الەمدى الاڭداتقان COVID-19 ۆيرۋسىنا قارسى كۇرەستە قازاقستاننىڭ سىرتتاي وقۋ ءتۇرىن قاشىقتىقتان وقىتۋعا الماستىرۋى ۇتىمدى شەشىم بولعانىن كورىپ وتىرمىز. سەبەبى قاشىقتىقتان وقىتۋ جۇيەسىنە جاپپاي كوشكەن جوو بۇگىندە ستۋدەنتتەردى ونلاين نۇسقادا ءبىلىم بەرۋمەن قامتاماسىز ەتىپ وتىر.

ۆيرۋسقا بايلانىستى كارانتين جاع­دايى جالعاساتىن بولسا، مەكتەپ وقۋشىلارى دا 6 ساۋىردەن باستاپ قاشىقتىقتان وقىتۋعا كوشەدى. بۇل تۋرالى ءبىلىم جانە عىلىم ءمينيسترى: «تەلەارنالار ارقىلى ساباق وتكىزۋگە دايىندالۋدامىز. وندا بەينە-ساباقتار سا­باق كەستەسىنە ساي كورسەتىلەتىن بولادى. بۇل تەتىك، اسىرەسە ينتەرنەت قۋاتى ءالسىز ءجا­نە قاجەتتى قۇرال-جابدىقتارعا قاتىستى قيىن­دىقتارى بار اۋىلدىق ءبىلىم بەرۋ ۇيىم­دارى ءۇشىن وزەكتى»، – دەپ تۇسىندىرگەن بو­لاتىن.

حالىقارالىق Túrkistan گازەتى وقىر­مان­دارعا ەلىمىزدەگى جوو-نىڭ قاشىق­تىق­تان وقىتۋ پروتسەسىنىڭ قالاي ءجۇرىپ جاتقانى ءجا­نە ونىڭ ءبىلىم ساپاسىنا اسەرى تۋرالى وقىتۋشىلار مەن ستۋدەنتتەردىڭ پىكىرىن تىڭداپ كورگەن ەدى.

 

گۇلميرا ساۋداباەۆا، پەداگوگيكا عىلىمدارىنىڭ دوكتورى، پروفەسسور:

بىلىمگە قۇشتار بالا جاعداي تالعامايدى

– قاشىقتىقتان وقىتۋ مەن ءۇشىن تاڭسىق ەمەس. ويتكەنى وقۋ پروتسەسىنىڭ بۇل ءتۇرىن ەلىمىزدەگى كوپتەگەن جوعارى وقۋ ورىندارى بۇرىننان جۇزەگە اسىرىپ كەلەدى. قاشىقتىقتان ءبىلىم بەرۋ تەحنولوگيالارى جۇمىس ىستەيتىن، وتباسىن قۇرعان ستۋدەنتتەرگە قولايلى. تاپسىرمانى تاۋلىكتىڭ كەز كەلگەن ۋاقىتىندا ورىنداي الادى. اسىرەسە، كوللەدج ءبىتىرىپ، جوعارى وقۋ ورنىنا تۇسكەن ستۋدەنتتەر قاشىقتىقتان وقىتۋ جۇيەسىن تەز مەڭگەرەدى. جالپى، وقيمىن دەگەن بالا قانداي جاعدايدا دا ءبىلىم الۋعا ۇمتىلادى. بۇل ءتاسىل ارقىلى ءبىلىمدى ءادىل باعالاۋ قيىن شىعار، مۇمكىن ىزدەنۋشى تاپسىرما جاۋابىن بىرەۋدەن كوشىرىپ الاتىن شىعار. ءبىز مۇنى كورە المايمىز، بىراق زامان تالابىنا ساي پايدا بولعان بۇل وقىتۋ ءتاسىلى ءتيىمدى بولىپ وتىر.

ال COVID-19 ۆيرۋسىنىڭ ەلىمىزدە تاراۋىنا بايلانىستى ستۋدەنتتەردىڭ جاپپاي قاشىقتىقتان وقىتۋعا كوشۋى ستۋدەنتتەردەن بولەك، وقىتۋشىلاردىڭ ءوزىن ءبىراز ءابىر­گەرگە سالعانىن جاسىرمايمىن. وقى­تۋ­شىلار پانگە قاتىستى بارلىق ماتەريالداردى ستۋدەنتتەرگە ىڭعايلى بولۋى ءۇشىن الدىن الا جۇيەگە سالىپ قويدى. ادەتتە ءبىز ءار سەميناردا ەڭ كوپ دەگەندە 10 ستۋدەنتتى تىڭداپ ۇلگەرەمىز. ال قاشىقتىقتان وقى­تۋعا كوشكەلى بەرى بىزدەن ءبىر توپتاعى 30 ستۋ­دەنتتى باعالاپ ۇلگەرۋىمىزدى تالاپ ەتىپ جاتىر. بىراق ءبىر وقىتۋشى 30 ستۋدەنتتەن تۇراتىن بىرنەشە توپقا ساباق بەرەدى. مىسالى، مەن جالپى العاندا 200-دەن استام ستۋدەنتكە ساباق بەرەمىن. بارلىق ستۋدەنتتىڭ جۇمىسىن تەكسەرۋ، باعالاۋ، سونىمەن قاتار قانشا ستۋدەنتتىڭ ساباققا قاتىسقانى نەمەسە قاتىسپاعانى، تاپسىرمانى ورىن­دا­عان-ورىنداماعانى جايىندا ەسەپ جاساۋعا دا ءبىراز ۋاقىتىمىزدى جۇمساپ جاتىرمىز. مىسالى، مەن جەر ۇيدە تۇرامىن، ءوزىمنىڭ جەكە جۇمىس كابينەتىم بار. ال جاتاقحانادا نەمەسە پاتەر جالداپ تۇراتىن وقىتۋشىلار ستۋدەنتتەردىڭ تاپسىرماسىن قالاي تەكسەرىپ جاتقانىن ءوزىڭىز سارالاي بەرىڭىز. جاقىندا اۋىلعا بارىپ كەلگەن ءبىر تانىسىم «ستۋ­دەنتتەردىڭ تاپسىرماسىن تەكسەرۋ ءۇشىن دا­لاعا جۇگىرۋمەن بولدىم. ويتكەنى اۋىلدى جەردە بارلىق جەردە ينتەرنەت جاقسى ىستەمەيدى ەكەن» دەپ كەلدى.

ال جالپىلاي العاندا، وقىتۋشىلار قا­شىقتىقتان وقىتۋعا دايىن. جوعارىدا ايتقانىمداي، وقيمىن دەگەن بالا جاعداي تاڭدامايدى، تەحنولوگيانى تەز يگەرىپ، تۇسىنبەگەن جەرىن ۆيدەوقوڭىراۋ جاساپ، سۇراپ الادى. ستۋدەنتتەرىم «اۋديتوريادا وتى­رىپ لەكتسيا تىڭداپ، بەتپە-بەت جۇزدەس­كەنگە جەتپەيدى ەكەن، قاشىقتىقتان وقى­تۋدان جالىقتىق» دەپ جاتىر.

 

گۇليرا حالىقوۆا، اباي اتىنداعى قازۇپۋ پروفەسسورى:

مۇعالىمدى ەشقانداي تەحنيكا الماس­تىرا المايدى

– ونلاين، وففلاين وقىتۋ بولسىن ساپالى ءبىلىم بەرۋدە اقپاراتتىق كوممۋ­ني­كاتسيالىق تەحنولوگيالاردى پايدالانۋدىڭ ماڭىزى قازىرگى ۋاقىتتا دالەلدەۋدى قاجەت ەتپەيدى. قازىر ءبىزدىڭ ۋنيۆەرسيتەتتىڭ بار­لىق ينستيتۋتىندا كومپيۋتەر كلاستارى تو­لىعىمەن جاڭارتىلعان. بۇل ۋنيۆەرسي­تەت­تىڭ قاشىقتىقتان وقىتۋعا دايىن ەكەنىن كورسەتەدى. ال ەندى قاشىقتىقتان وقىتۋ ءما­سەلەسىنە كەلەتىن بولساق، فيلوسوفيادا قا­راما-قارسىلىقتىڭ بىرلىگى مەن كۇرەس زاڭى دەگەن بار. كەز كەلگەن نارسەنىڭ جە­تىستىگى مەن كەمشىلىگى بولاتىنىن بىلدىرەدى. ءبىرىنشى وڭ جاعىنا كەلەتىن بولساق، قاشىق­تىقتان وقىتۋ، بۇكىل الەمدە ىندەت جايلاپ جاتقان كەزدە ەشنارسەدەن حابار-وشارسىز وتىرعان ستۋدەنتتەردىڭ وقۋ پروتسەسىنەن قول ۇزبەي، وقۋدى ادەتتەگىدەي بولماسا دا جۇزەگە اسىرۋعا، ءبىلىم الۋعا مۇمكىندىك بەرەدى. وسى تۇستا  وقىتۋ ساپاسىنىڭ جاقسى بولۋى، بىرىنشىدەن، وقۋ ورىندارىنىڭ تەحنيكالىق تۇرعىدان ونلاين جۇيەمەن وقىتۋعا قان­شا­لىقتى دايىندىعىنا، ەكىنشىدەن، باعدار­لا­مالىق تۇرعىدان، ال ۇشىنشىدەن، وقۋ-ادىستە­مە­لىك تۇرعىدان قامتاماسىز ەتىلۋ دەڭگەيىنە  بايلانىستى.

مۇندا كۇتپەگەن جەردەن «قاشىقتىقتان وقىتۋدى جۇرگىزۋگە وقىتۋشىلار پسيحولو­گيا­لىق تۇرعىدان دايىن با؟» دەگەن سۇراق­تىڭ تۋىندايتىنى زاڭدى. ينفورماتيكا جانە جاراتىلىستانۋ پاندەرىنىڭ ماماندارىنا قاشىقتىقتان وقىتۋدى جۇرگىزۋ ونشا قيىندىق تۋعىزا قويمايدى، بىراق باسقا گۋمانيتارلىق ءپاننىڭ وقىتۋشىلارى قا­شىق­تىقتان وقىتۋ بويىنشا دايىندىقتان وتپەستەن باستاپ كەتتى. ونلاين وقىتۋدى ءدال قازىرگى مەزەتتە وسىنداي دايىندىقپەن جۇزەگە اسىرۋ ويداعىداي جاقسى ناتيجە بەرەدى دەپ ايتا المايمىن. بۇل بىرقاتار وبەكتيۆتى جانە سۋبەكتيۆتى فاكتورلارعا تاۋەلدى. ەڭ الدىمەن، پايدالانىلىپ وتىر­عان باعدارلامالىق قۇرالعا بايلانىستى. دالىرەك ايتقاندا، باعدارلامالىق قۇرال 100 پايىز اقىسىز پايدالانۋعا ارنالعان با الدە ءبىراز ۋاقىت وتكەننەن كەيىن ساتىپ الۋ­دى تالاپ ەتە مە؟ بۇگىنگى ۋنيۆەرسيتەت وقى­تۋشىلارىنىڭ كەز كەلگەن باعدارلا­مالىق قۇرالدى ساتىپ الا بەرۋگە قالتاسى كوتەرمەيدى. مىسالى، مەنىڭ ءبىر ساباعىمدا پايدالانعان باعدارلامالىق قۇرال كەلەسى پانگە كەلگەندە اقىلى بولۋى نەمەسە اشپاي قالۋى مۇمكىن. اياق استىنان 1-2 ساعاتتىڭ ىشىندە باسقا قۇرالدى ىزدەپ تاۋىپ، پاي­دالانۋعا تۋرا كەلەدى. سوندىقتان وسىنداي جاعدايلارعا دايىن بولۋ ءۇشىن ەكى ونلاين پلاتفورمانى دايارلاپ قويۋ كەرەك.  بىرەۋى جاراماي قالسا، ەكىنشى باعدارلامالىق قۇرال­مەن ساباقتى ءۇزىپ الماي وتكىزۋگە دايىن بولۋ دەگەن ءسوز. وسىنداي ىزدەنىستىڭ ارقاسىندا ستۋدەنتتەرمەن وففلاين كەزدە قان­داي ناتيجە بولسا، ونلاين كەزىندە دە سونداي ناتيجە الۋعا تىرىسىپ جاتىرمىز. ونلاين وقىتۋدا وقىتۋشى ۋاقىتتان ۇتىلۋى مۇمكىن. تەحنيكالىق پاندەرگە قا­تىستى اۋديتوريادا 1-3 مينۋتتىڭ ىشىندە كور­سەتىپ، تۇسىندىرەتىن ماسەلەلەر قاشىق­تىق­تان وقىتۋدا 10-15 مينۋتقا سوزىلىپ كەتۋى مۇمكىن.

كەلەسى نەگىزگى ماسەلە – كەز كەلگەن ءپاندى وقۋ-ادىستەمەلىك تۇرعىدان قامتاماسىز ەتۋ. قازىرگى ۋاقىتتا ەلىمىزدەگى كوپتەگەن جوعارى وقىتۋ ورىندارىندا قاشىقتىقتان وقىتۋ قولعا الىنعان جانە «ۋنيۆەر»، «پلاتونۋس» جانە ت.ب. جۇيەلەرى پايدالانىلىپ وتىر. اباي اتىنداعى قازاق ۇلتتىق پەداگوگي­كا­لىق ۋنيۆەرسيتەتىندە «ۋنيۆەر» جۇيەسى پاي­دالانىلادى جانە قازىرگى ۋاقىتتا بارلىق ما­ماندىقتار ءۇشىن وقۋ-ادىستەمەلىك كەشەندەر مەن وقۋ ماتەريالدارى تولىعىمەن جۇيەگە ورنالاستىرىلعان. بۇل ۋنيۆەرسيتەت ستۋدەنتتەرىنىڭ بارلىق وقۋ ماتەريالدارىنا قولجەتىمدىلىگىن كورسەتەدى. دالىرەك ايت­قاندا، ىزدەنگەن ستۋدەنتكە ءبىلىم دايىن!

وقىتۋدىڭ قانداي ءتۇرى بولماسىن، وقى­تۋشىلار ءبىرتۇتاس پەداگوگيكالىق پروتسەستى بارلىق ۋاقىتتا جۇزەگە اسىرىپ وتىرۋى كەرەك. ونلاين ساباق ءتۇسىندىرۋ، ۇيرەتۋدىڭ ءجونى ءبىر بولەك، ال وففلاينداعى بەتپە-بەت ستۋ­دەنتتەرمەن جۇزدەسۋ بارىسىندا ءتار­بيەلىك، ادامگەرشىلىك تۇرعىدان ايتىلاتىن نەگىزگى ماسەلەلەر تەحنيكانىڭ تاساسىندا قالىپ قويادى. العاشقى ناتيجەدەن بايقا­عانىم – وسى. سوندىقتان ەشقانداي ەلەكتروندى وقۋ قۇرالى، ەشبىر تەحنيكا تابيعي قارىم-قاتىناستى الماستىرا المايدى. ءبىز قازىرگى ۋاقىت تالابىنا ساي مامانداردى دايارلاۋ ءۇشىن جانە وقىتۋ تيىمدىلىگىن جاق­سارتۋ ءۇشىن عانا تەحنيكانى پايدالانۋىمىز كەرەك دەپ ويلايمىن.

قاشىقتىقتان وقىتۋ دەگەنىمىز قارا­پايىم تىلمەن ايتقاندا، ستۋدەنتتىڭ ءوز بەتى­مەن وقۋى. ول ەڭ الدىمەن ستۋدەنتتى ءوزىن­دىك وقۋ ءىس-ارەكەتىن ءتيىمدى ۇيىم­داس­تىرۋ­عا دايارلاۋدى تالاپ ەتەدى. ءتىپتى، بۇل ءما­سەلە جالپى ءبىلىم بەرەتىن ورتا مەكتەپتىڭ قابىرعاسىنان قالىپتاسۋى ءتيىس. ءوز بەتىمەن وقۋ ءۇشىن ستۋدەنتتىڭ تانىمدىق قىزىعۋ­شىلىعى، بەلسەندىلىگى بولۋى كەرەك. ءبىز ول قىزىعۋشىلىق پەن بەلسەندىلىكتى بەتپە-بەت جۇزدەسۋ بارىسىندا كورە الماساق، ونلاينعا كوشكەن كەزدە ءوز بەتىمەن كەلە قالادى دەگەن ءسوز ابسۋرد دەر ەدىم. ءبىز ءداستۇرلى وقىتۋ بارىسىندا سۇرانىسقا يە مامانداردى بۇگىنگى قوعام تالابىنا، ونىڭ ىشىندە، اقپاراتتىق قوعامنىڭ تالاپتارىنا ساي، قۇزىرەتتىلىگى قالىپتاسقان مامانداردى ءوز دەڭگەيىندە دايارلاي الماي كەلەمىز. بۇعان دالەل رەتىندە ەلىمىزدەگى قاعاز جۇزىندەگى ەمەس، شىنايى جۇمىسسىزدىق دەڭگەيىن ايتۋعا بولادى. ال وسى اتالعان ماسەلە قاشىقتىقتان وقىتۋ جاعدايىندا شەشىمىن تابا قالادى دەپ ايتۋ قيىن. بۇگىنگى ءبىلىم بەرۋ وشاقتارىنداعى قا­لىپتاسقان شىنايى جاعدايلاردى ەسكەرسەك، قاشىقتىقتان وقىتۋ ارقىلى ساپالى مامان دايارلايمىز دەپ ايتا المايمىن. ويتكەنى جۇزبە-ءجۇز، بەتپە-بەت وقىتۋ بارىسىندا ءبىز ول مەجەگە جەتە المادىق. بۇل شىندىق، ەگەر كەز كەلگەن جالپى ءبىلىم بەرەتىن ورتا مەكتەپ، جوعارى وقۋ ورىندارى بولسىن، ءبىلىم بەرۋ ساپاسى جوعارى دەڭگەيدە دەيتىن بولساق، ءبىزدىڭ قوعام الدەقايدا دامىپ كەتكەن بولار ەدى، ەلىمىزدىڭ ءبىلىمدى جاستارىنىڭ كوپشىلىگى ءبىلىم ىزدەپ شەتەل اسىپ كەتپەيتىن ەدى.

ءدال قازىرگى ساتتە، قاشىقتىقتان وقىتۋدىڭ وقىتۋشىلارعا ءتيىمسىز تۇسى، باسشىلارعا جاساعان جۇمىسىڭ تۋرالى 5 كۇن بەرگەن ساباعىڭا 3 ساعات وتىرىپ ەسەپ جازۋ. قانشا ستۋدەنت قاتىستى، ءبارىن قاراپ، بايلانىسقا شىقپاعان ستۋدەنتتىڭ سەبەبىن انىقتاپ، ەسەپ بەرۋ. وسىنداي ۇساق-تۇيەك قوسىمشا جۇمىستار ۋاقىتتى الادى جانە جۇيكەگە سالماق سالادى.

 

اقنۇر شىڭعىسحانقىزى، ستۋدەنت:

ونلاين وقىتۋ ستۋدەنتتەردىڭ كوڭىلىنەن شىعىپ جاتقان جوق

– ونلاين وقىتۋ كوپ ستۋدەنتتىڭ كوڭى­لىنەن شىعىپ جاتقان جوق. سەبەبى بارلىق پاننەن بەرىلگەن اقپاراتتى يگەرۋ قيىنعا سوعىپ جاتىر. ءاربىر لەكتسيادا كەم دەگەندە 60-70 ستۋدەنت وتىرادى. اۋديتوريانىڭ ءوزىن­دە وسىنشا ستۋدەنتكە ءتۇسىندىرۋ وڭاي ەمەس، ال ونلاين تۇردە مۇلدەم قيىن بولىپ جاتىر. تاپسىرمالاردى ورىنداعاندا، سەميناردا ساباق ايتقاندا اۋىزشا جەتكىزۋ وڭايىراق ەكەن. ءار ساباقتىڭ سەمينارى، ءسوج جانە قوسىمشا تاپسىرمالارى بار، ءبارىن ءبىر ۋاقىتتا مۇعالىمگە جىبەرىپ ۇلگەرۋ كەرەك. ستۋدەنتتەر كومپيۋتەردەن باسىن الا الماي قالدى. مۇمكىن ونلاين وقىتۋدى ءبىز دۇرىس مەڭگەرە الماي جاتقان شىعارمىز، الايدا كوزبەن كورىپ، بىلگەنىڭدى بولىسكەنگە جانە بىلمەگەنىڭدى مۇعالىمنەن سۇراعانعا ەشتەڭە جەتپەيدى ەكەن.

قاشىقتىقتان وقىتۋ Zoom, Discord سياق­تى قوسىمشالار ارقىلى جۇرگىزىلىپ جاتىر. اۋىلداعى ستۋدەنتتەرگە قيىن، ويتكەنى ينتەرنەت بايلانىسى وتە ناشار. مۇعالىمنىڭ كەيبىر ايتقان سوزدەرى دۇرىس ەستىلمەي جاتادى. كەي مۇعالىمدەر مۇنداي جاعدايعا ستۋ­دەنتتەرگە تۇسىنىستىك تانىتىپ جاتىر، ال كەيبىرى «بۇل مەنىڭ ماسەلەم ەمەس» دەپ سا­باقتا بولمادى دەپ بەلگىلەپ جاتىر. كەيبىر ستۋدەنتتەر قاشىقتىقتان وقىتۋعا مۇلدەم قاتىسىپ جاتقان جوق. ونلاين جۇيەنى قوسىپ قويعان ستۋدەنتتىڭ ءبارىنىڭ نازارى ساباقتا بولادى دەي المايمىن. ءوزىنىڭ ۆيدەو جانە اۋديوقوڭىراۋىن وشىرەدى دە مۇعالىمنىڭ ايتىپ جاتقان لەكتسياسىن تىڭ­داماي، ويى باسقا جاقتا نەمەسە ءۇي تىرلىگىمەن اينالىسىپ ءجۇرۋى مۇمكىن. ال ۋنيۆەر­سيتەتتىڭ زالىندا نازارىڭ مۇعالىمدە بولادى، اۋىزشا ايتقانى ساعان جاقسىراق اسەر ەتەدى.

 

ايجان ادامبەكوۆا، الماتى وبلىسىنىڭ ءبىلىم باسقارماسى، ورتا ءبىلىم، وقىتۋدىڭ جاڭا تەحنولوگياسى مەن يننوۆاتسيا ءبولىمىنىڭ باسشىسى:

تەلەارنا مەن ينتەرنەت ارقىلى وقىتۋدىڭ تيىمدىلىگىن بولجاي المايمىز

– الماتى وبلىسىندا 760 مەملەكەتتىك مەكتەپ بار، ونىڭ 87 پايىزى اۋىلدى جەر­لەر­دە ورنالاسقان. ال اۋىلدىق جەردەگى وقۋ­شىلاردىڭ بارلىعىنا ينتەرنەت قولجەتىمدى دەپ ايتا المايمىز. بۇگىنگى تاڭدا وقۋشىلار 3-توقساننىڭ دەمالىسىندا ۇيدە بولسا، مۇعالىمدەر قاشىقتىقتان جۇمىس ىستەپ جاتىر. قاشىقتىقتان وقىتۋعا كوشۋدەگى وقۋشىلار مەن مۇعالىمدەردىڭ مۇمكىندىگى زەرتتەلىپ جاتىر.

ءبىز ءبىلىم جانە عىلىم مينيسترلىگى تاراپىنان كەلەتىن تاپسىرمانى ورىنداۋعا كۇشىمىزدى سالاتىن بولامىز. مەكتەپتەر Bilimland.kz رەسۋرسىنا جانە Daryn.online اقپاراتتىق جۇيەسىنە تىركەلگەن.  ازىرگە  وسىن­داي دايىندىق  جۇمىستارى جۇرگىزىلىپ  جاتىر.

قاشىقتىقتان وقىتۋ ءبىلىم ساپاسىنا قان­شالىقتى اسەر ەتەتىنىن بولجاي المايمىز، ويتكەنى مۇنداي تاجىريبە العاش رەت قول­دانىلعالى تۇر.

 

سوڭعى جاڭالىقتار