23 ناۋرىز, 17:19 2468 0 الەۋمەت انار لەپەسوۆا

پرەزيدەنت تاپسىرماسى: حالىقتىڭ نەسيە جانە سالىق تولەمى كەيىنگە شەگەرىلەدى

پرەزيدەنت قاسىم-جومارت توقاەۆ توتەنشە جاعداي كەزىندە قازاقستاندىقتاردىڭ نەسيە جانە سالىق تولەمدەرىن كەيىنگە شەگەرۋدى تاپسىردى. 

"مەن بانكتەردىڭ جاعدايعا تۇسىنىستىك تانىتادى دەپ ويلايمىن", – دەپ اتاپ ءوتتى توقاەۆ.

قازاقستان پرەزيدەنتىنىڭ سوزىنە قاراعاندا، ازاماتتاردىڭ قارجىلىق جاعدايى ناشارلاندا، ولار كەپىلسىز نەسيەلەر ءۇشىن بانكتىك ەمەس سەكتوردىڭ كومەگىنە جۇگىنەدى. لومباردتارعا، ينتەرنەت-نەسيە بەرۋشىلەر مەن ميكروقارجىلىق كومپانيالاردان اقشا الۋعا ءماجبۇر بولادى.

"بۇل رەتتە حالىقتى الاياقتىقتان ساقتاندىرىپ، سالادا ءتارتىپ ورناتۋدىڭ ماڭىزى زور", – دەدى توقاەۆ توتەنشە جاعداي جونىندەگى مەملەكەتتىك كوميسسيانىڭ وتىرىسىندا.

ء"بىز "كۇشتى داۋىلدىڭ" كۋاسى بولىپ وتىرمىز. پاندەميا، مۇناي سۋپەردەرجاۆالارىنىڭ شايقاسى جانە قور يندەكستەرىنىڭ رەكوردتىق تومەندەۋى سوڭعى جىلدارى جاھاندىق ەكونوميكالىق جۇيە تەڭگەرىمىنىڭ بۇزىلۋىنا اكەپ سوقتى", – دەدى مەملەكەت باسشىسى.

پرەزيدەنت مۇنداي جاعدايدا، باسەكەگە قابىلەتتى كاسىپكەرلىككە كومەكتەسۋدىڭ ماڭىزدىلىعىنا توقتالدى.

ول توتەنشە جاعدايدان زارداپ شەككەندەردى تەز انىقتاپ، تۇرعىنداردىڭ ەكونوميكالىق سۇرانىسىن ازايتىپ، ولاردى قولداۋ بويىنشا بىرقاتار شارالاردى جۇزەگە اسىرۋ كەرەك ەكەنىن ايتتى. سونىمەن قاتار كاسىپكەرلىك قىزمەتتى ىنتالاندىرۋ مەن باعانىڭ تۇراقتىلىعىن قامتاماسىز ەتۋ بويىنشا شارالار كەشەنىن ازىرلەۋدى تاپسىردى.

"شاعىن جانە ورتا بيزنەسكە ايىپپۇلدار مەن ءوسىمپۇلدار تولەمەي، سالىقتاردىڭ جانە باسقا دا مىندەتتى تولەمدەردىڭ بارلىق ءتۇرىن تولەۋدى 3 ايعا كەيىنگە قالدىرۋدى ۇسىنۋ قاجەت دەپ سانايمىن", – دەدى ق.توقاەۆ.

ونىڭ ايتۋىنشا، اۋىلشارۋاشىلىق ونىمدەرى مەن ازىق-تۇلىك تاۋارلارىنا قوسىمشا قۇن سالىعىن ۋاقىتشا تومەندەتۋ، ماڭىزدى يمپورتقا كەدەندىك باجداردى جويۋ جانە تاعى باسقا شارالاردى قاراستىرۋ قاجەت.

"بۇل جۇمىس ءبىر اپتا ىشىندە جۇزەگە اسۋى ءتيىس", – دەدى پرەزيدەنت.

 

سوڭعى جاڭالىقتار