23 ناۋرىز, 10:06 274 0 دەنساۋلىق انار لەپەسوۆا

تۇركيادا 65 جاستان اسقان ازاماتتاردىڭ ۇيدەن شىعۋىنا تىيىم سالىندى

تۇركيا بيلىگى ەلدەگى 65 جاستان جوعارى جانە سوزىلمالى اۋرۋى بار ازاماتتاردىڭ ۇيدەن شىعۋىنا تىيىم سالدى. بۇعان مەملەكەتتە ىندەتكە شالدىققان قاريالار سانىنىڭ ارتۋى سەبەپ. 

سوڭعى دەرەك بويىنشا، تۇركيادا قاۋىپتى دەرتكە شالدىققانداردىڭ سانى 1200-دەن اسىپ جىعىلدى. ونىڭ 289-ى سوڭعى  تاۋلىكتە تىركەلگەن.

ەلدە كوروناۆيرۋستان 30 ادام كوز جۇمعان. دەنساۋلىق ساقتاۋ ءمينيسترىنىڭ ايتۋىنشا، قازا تاپقانداردىڭ دەنى – 60 جاستان اسقان ازاماتتار. سوندىقتان ەل بيلىگى قاتاڭ شارالارعا بارۋعا ءماجبۇر. 

دەسە دە، ەگدە جاستاعىلاردىڭ ىشىندە شەشىمدى ەلەمەي، ورتالىق ساياباقتار مەن قوعامدىق كولىكتەرگە مىنۋشىلەر بار. بۇعان شەكتەۋ قويۋ ءۇشىن اكىمدىكتەر 60 جاستان اسقان قارتتاردىڭ اۆتوبۋستا اقىسىز ءجۇرۋ كۋالىگىن ۋاقىتشا جارامسىز دەپ جاريالاپ، قوعامدىق جەرلەردەگى ورىندىقتاردى الىپ تاستادى.

ايتا كەتەيىك، بۇعان دەيىن وزبەكستاندا كوشەدە ماسكاسىز جۇرۋگە تىيىم سالىنعانىن حابارلاعانبىز. ەلدە بەتتى تۇمشالايتىن قورعانىس قۇرالدارى جوق ادامدارعا ايىپپۇل سالىنادى.

تالاپتى العاش رەت بۇزعان ازاماتتار 223 مىڭ سۋم، ياعني 23 دوللار (1 بازالىق ەسەپتىك مولشەرلەمە) كولەمىندە ايىپپۇل ارقالاسا، ەرەجەنى قايتالاپ بۇزعاندار 3 بازالىق ەسەپتىك مولشەرلەمە كولەمىندە (669 مىڭ سۋم - 70 دوللار) ايىپپۇل تولەيدى. 

سوڭعى جاڭالىقتار