28 قىركۇيەك, 14:58 501 0 جاڭالىقتار اسىل تۇمار

قۇس تۇماۋى ادامعا جۇعا ما؟

قر جۇمىرتقا وندىرۋشىلەر قاۋىمداستىعى ەلىمىزدىڭ بىرقاتار وبلىسىندا قۇس تۇماۋىنىڭ تارالۋىنا بايلانىستى تۇتىنۋشىلار ءبىلۋى ءتيىس نەگىزگى فاكتىلەردى اتادى.

«قۇس تۇماۋىنىڭ جاعدايى باقىلاۋعا الىنادى دەپ ۇمىتتەنەمىز. قازىرگى ۋاقىتتا جەكە اۋلالارداعى قۇستاردى تۇماۋعا قارسى ۆاكتسيناتسيالاۋ جۇرگىزۋ قاجەت. سونداي-اق، بۇرىن تۇماۋعا قارسى ۆاكتسيناتسيالاۋ جۇرگىزبەگەن قۇس فابريكالار ءۇشىن ۆاكتسينالار ءبولۋ كەرەك. ويتكەنى بۇل اۋرۋدىڭ سوڭعى ءورشۋى قازاقستاندا 2005 جىلى تىركەلگەن بولاتىن. سونىمەن قاتار، قۇس فابريكالارىنىڭ بانكروتقا ۇشىراۋىنا جانە جەكە قوسالقى شارۋاشىلىقتاردىڭ زالال شەگۋىنە جول بەرمەۋ ءۇشىن كاسىپورىنداردىڭ، قۇستاردىڭ ءولىم-ءجىتىمى ورىن العان جەكە ادامداردىڭ شىعىندارىنىڭ ورنىن تولتىرۋ ماسەلەلەرىن قاراستىرۋ قاجەت دەپ سانايمىز»، – دەدى قازاقستاننىڭ جۇمىرتقا وندىرۋشىلەر قاۋىمداستىعىنىڭ باسشىسى ماكسيم بوجكو.

قاۋىمداستىقتىڭ مالىمەتىنشە، اۋرۋ تەك مەكيەن تاۋىقتاردىڭ اراسىندا عانا تارالادى. برويلەر قۇسىنىڭ اۋرۋعا ۇشىراۋى تىركەلمەگەن. دەمەك، ونەركاسىپتىك ءوندىرىستىڭ قۇس ەتىن، سونداي-اق ودان جاسالعان ونىمدەردى تۇتىنۋ حالىق ءۇشىن قاۋىپ توندىرمەيدى. بۇدان باسقا، بۇگىنگى كۇنى دۇكەندەردىڭ سورەلەرىندە ۇسىنىلعان قۇس فابريكالارىنىڭ ونىمدەرى ۆەتەريناريالىق تەكسەرۋدەن وتەدى جانە ءتيىستى سەرتيفيكات بولعان جاعدايدا تاماققا قولدانۋ ءۇشىن مۇلدەم قاۋىپسىز بولىپ تابىلادى.

«جۇمىرتقا ونىمدەرىنىڭ قاۋىپسىزدىگىنە كەلەتىن بولساق، ىندەت جۇمىرتقا ءوندىرۋ باعىتىنداعى ەكى قۇس فابريكاسىندا تىركەلدى. قازىرگى ۋاقىتتا وسى كاسىپورىنداردان ونىمدەردى جونەلتۋ توقتاتىلدى. جالپى، ەلىمىزدە وسىنداي 35 كاسىپورىن جۇمىس ىستەيدى. ولاردىڭ ونىمدەرى قاۋىپسىزدىك پەن ساپاعا تولىق تەكسەرۋدەن ءوتتى»، – دەپ اتاپ ءوتتى قاۋىمداستىقتان.

ادەتتە قۇس تۇماۋىنىڭ ۆيرۋستارى اۋىرعان قۇستان ادامعا جۇقپايدى. دەگەنمەن، كەيبىر جوعارى پاتوگەندى شتامدار ادامداردا اۋىر تىنىس الۋ اۋرۋىن تۋدىرۋى مۇمكىن. قۇس ەتىن جانە ودان جاسالعان ونىمدەردى تاماققا قولدانۋ ءتيىستى گيگيەنا جانە تاماق دايىنداۋ ەرەجەلەرىن ساقتاعان كەزدە قاۋىپسىز سانالادى. جاقسى قايناتىلعان نەمەسە قۋىرىلعان قۇس ەشقانداي قاۋىپ توندىرمەيدى.

سوڭعى جاڭالىقتار