28 قىركۇيەك, 11:35 3406 0 جاڭالىقتار اسىل تۇمار

ەلىمىزدىڭ اۆتوجولدارىنا داتچيكتەر قويىلۋدا

ەلىمىزدىڭ اۆتوجولدارىندا جول قۇرىلىمى مەن توپىراقتىڭ تەمپەراتۋراسىن، ىلعالدىلىعىنىڭ دەڭگەيىن كورسەتەتىن داتچيكتەر ورناتىلۋدا.

«قازجولعزي» اق مەن «جول اكتيۆتەرى ساپاسىنىڭ ۇلتتىق ورتالىعى» رمك بىرلەسىپ، جول قۇرىلىمى مەن ونىڭ توپىراقتى تابانىنىڭ تەمپەراتۋراسى مەن ىلعالدىلىعى دەڭگەيىن انىقتاۋعا ارنالعان داتچيكتەردى ورناتۋ شارالارىنا كىرىستى. بۇدان بولەك، جولداردى پايدالانۋ كەزىندە ورىن العان كورسەتكىشتەردىڭ وزگەرىستەرىن باعالاۋعا باعىتتالعان زەرتتەۋلەر جۇرگىزىلىپ جاتىر»، – دەلىنگەن قر يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىندە.

جولداردى پايدالانۋ كەزىندە ولاردىڭ ساپاسىنا كوپتەگەن فاكتورلار اسەر ەتەدى. جولدان وتەتىن كولىك سانىنىڭ كوپتىگى، جولعا تۇسىرىلەتىن جۇكتەمەنىڭ شامادان اسۋى، ەلىمىزدىڭ كليماتتىق جاعدايى (اسىرەسە، تەمپەراتۋرالىق-ىلعالدىق رەجيم) جول قۇرىلىمىنىڭ بەرىكتىگىنە، تۇيىرشىكتى قۇرامعا، جول جامىلعىسى قاباتتارىنىڭ تىعىزدىعىنا، جولدىڭ جاعدايىنا ءوز اسەرىن تيگىزەدى.

«ورناتىلعان ارنايى داتچيكتەر ستاتيستيكالىق مالىمەتتەردى جيناپ، جول جابىندىسى ساپاسىنىڭ وزگەرۋىنە سەبەپ بولعان جاعدايلاردى انىقتاۋعا، جول قۇرىلىمىنىڭ جاعدايىن تولىققاندى زەرتتەۋگە مۇمكىندىك بەرەدى. بۇل ءوز كەزەگىندە عالىمدارعا ەلىمىزدىڭ ءار ءتۇرلى وڭىرلەرىندەگى كليماتتىق جاعدايلار مەن جول ۋچاسكەلەرىنە تۇسىرىلەتىن جۇكتەمەلەردى ەسەپكە الا وتىرىپ، قۇرىلىس، قايتا جاڭارتۋ جانە جوندەۋ جۇمىستارىنىڭ تەحنولوگياسىن تۇزەتۋگە مۇمكىندىك بەرمەك»، – دەلىنگەن ۆەدومستۆو مالىمەتىندە.

قازىرگى كەزدە «پەتروپاۆل – قورعان» جانە «نۇر-سۇلتان قالاسىنىڭ وڭتۇستىك-باتىس اينالما جولى» اۆتوموبيل جولدارىنىڭ ۋچاسكەلەرىن زەرتتەۋ جۇمىستارى جۇرگىزىلىپ جاتىر. سونىمەن قاتار، الداعى ۋاقىتتا ماماندار «ومبى – مايقاپشاعاي»، «قۇرتى – بۋرىلبايتال» جانە «اقتوبە – اتىراۋ» تاسجولدارىنىڭ ۋچاسكەلەرىن زەرتتەيتىن بولادى.

سوڭعى جاڭالىقتار