15 Qyrkúıek, 13:46 4303 0 Bilim Anar LEPESOVA

Mınıstr UBT kezindegi bylyqtardy jaıyp saldy

UBT-ǵa qatysý erejelerin qatańdatý arqasynda bıyl tyıym salynǵan zattardy emtıhanǵa alyp kiretindediń sany 70 esege azaıǵan. Bul týraly Bilim jáne ǵylym mınıstri Ashat Aımaǵambetov málim etti. 

Jańa ereje boıynsha bıyl tyıym salynǵan zattarmen ustalǵandar ǵana emes, ony alyp kirýge áreket etkender de emtıhanǵa qatysý múmkindiginen aıryldy.

"Buryn metall izdegish quraldar arqyly tekserý kezinde telefon tabylsa, ony alyp qalatyn edik, biraq talapker testileýge qatysa beretin. Mundaı ereje kezinde tártip buzýshylar sany elimiz boıynsha 100-150 myńnan asatyn. Talapker emtıhanda telefonmen ustalǵan kúnniń ózinde ony qoldanyp úlgergenin de dáleldeý kerek bolǵan. Bul jaǵdaı UBT-ny ótkizý rásimine degen senimsizdikke ákep soqtyrdy", - dep jazdy mınıstr Facebook-tegi paraqshasynda.

Ashat Aımaǵambetovtiń aıtýynsha, UBT ótkizý talaptarynyń qatańdatylýy nátıjesinde ortasha upaı tómendedi, paıyzdyq mólsherde shekti ball jınaǵan talapkerlerdiń sany edáýir azaıdy. Alaıda bul qadam testileýdiń ádil ótýi úshin jasalyp otyr.

Sondaı-aq, bıyl  UBT-ny ótkizý erejelerin buzǵany nemese jumysty nashar uıymdastyrǵany úshin 20-dan astam komıssııa músheleri men basshylary jazalandy.

"Kún saıyn test tapsyrý pýnkterinde komıssııalardyń quramyn ózgertip, mindetine nemquraıly qaraǵan mamandardy aýystyrýǵa nemese jumystan shettetýge týra keldi. Oǵan qosa, birneshe pýnkte jappaı zańbuzýshylyqtardyń ashyq jáne óreskel túrde oryn alýyna baılanysty testileýdi múldem toqtatýǵa jáne basqa kúnderge aýystyrýǵa májbúr boldyq. Mundaı jaǵdaı Shyǵys Qazaqstan men Túrkistan oblystarynda kezdesti. Degenmen, qajetti tártipti qamtamasyz ete aldyq", - deıdi mınıstr.

Eske sala keteıik, buǵan deıin Bilim jáne ǵylym mınıstri 2021 jyly UBT bazasy tolyq jańartylatynyn málimdegen edi.

Ashat Aımaǵambetovtiń sózinshe, sońǵy birneshe jylda testileý suraqtarynyń bazasyn jańartý boıynsha jumys júrgizilgendigine qaramastan suraqtardyń basym bóligi áli de qajetsiz faktilerdi jattap, este saqtaýǵa baǵyttalǵan. Budan bylaı fýnkıonaldyq saýattylyqqa mán berilmek. Ol úshin mınıstrlik UBT bazasyn SAT, PISA sekildi testerdiń úlgisi boıynsha tolyq jańartý máselesin qolǵa alady.

 

Sońǵy jańalyqtar