21 Aqpan, 20:27 373 0 Jańalyqtar Asyl TUMAR

Oıyn avtomattaryna 5 mıllıon teńge utylǵan. Ákimdik nege qaýqarsyz?

Sýret ǵalamtordan alyndy
Sýret ǵalamtordan alyndy

Almaty oblysynda oıyn avtomattaryna mıllıondap qarjy utylǵan bir top azamat qurylǵylardyń kózin joıýdy talap etýde, – dep jazdy QazAqparat.

Shaǵymdanýshylar ondaı avtomattar mekteptiń qasynda, halyq kóp jınalatyn saýda oryndarynda turǵanyn aıtady. Ákimdik avtomattar jóninde zań oryndaryna hat joldaǵan.

Narazylyq tanytqan turǵyndardyń keıbiri oıyn avtomattaryna mıllıondaǵan aqsha utylǵan. Olardyń aıtýynsha, aýyldaǵy dúkenderde termınaldyń 40-50-i tur. Turǵyndar ákimdikke de barǵan, zań oryndaryna da shaǵymdanǵan.

«Talaı ata-ana zar jylap otyr, balalary osyǵan kirip ketip. Onyń biri – menmin. Balamdy ustaı almaı qaldym. Ózinen ózi aqshasynyń bárin osyndaıǵa joq qylyp, eń aqyry óz-ózine qol jumsap, qaıtys boldy», – deıdi Turar aýylynyń turǵyny Ońǵarbaı Erimbetov.

Jınalǵandar osy oıyn avtomattary talaı otbasyn oırandap ketkenin aıtady.

«Aptasyna 20-30 myń tapsam, osyǵan ketedi. Ony bári biledi. Otbasymen ajyrasyp, bala-shaǵamnan aıyrylyp qalamyn, qaıtyp qosylamyn. Sóıtip júrmin», – dedi Shamalǵan aýylynyń turǵyny Azamat Alpysbaev.

«Qanshama urlyq, tóbeles shyǵady. Kerek emes bul, alyp tastasyn. Men oınaǵaly úsh mıllıondaı aqsha salyp tastadym buǵan», – dedi sol aýyldyń turǵyny Salamat Qadyrov.

Úsh mıllıon teńge Salamattyń alty aıda utylǵan qarjysy. Al taǵy bir jigittiń aǵasy 5 mıllıon teńge quıypty.

«Aýyl halqynan shaǵym jıi túsedi» degen ákimdik avtomattardyń jumysyn toqtata almaı otyr.

Qarasaı aýdany Jibek joly okrýgi ákiminiń orynbasary Almat Qalabaev: «Ekonomıkalyq tergeý departamentine hat joldadym. Maǵan jaýap keldi, resmı hat ta bar. Bul avtomattardyń barlyǵy – lotoreıa, barlyǵy zańǵa sáıkes tekserdik delingen», – deıdi.

«Qurylǵylardyń ıesinen dúken ıeleri aı saıyn aqy alady» deıdi narazy top. Oıyn avtomattarynan ábden utylǵandar qurylǵylardyń kózin joıýdy talap etýde.

Sońǵy jańalyqtar