14 Aqpan, 11:19 525 0 Óner Anar LEPESOVA

"Dırektorymyz aýyspasyn!": Áýezov teatrynyń qyzmetkerleri Prezıdentke hat joldady

"Túrkistan" gazetiniń elektrondy poshtasyna M.Áýezov atyndaǵy Qazaq memlekettik akademııalyq drama teatry ujymy, QR Halyq ártisteri, QR eńbek sińirgen qaıratkerleri atynan prezıdent Q.Toqaevtyń atyna joldanǵan hat kelip tústi. Onda "Teatr dırektory Sábıt Ábdihalyqov basshylyq qyzmetten negizsiz alynǵaly jatyr" degen óner ordasynyń ujymy Q.Toqaevtan dırektordyń óz laýazymynda qyzmetin jalǵastyrýyna yqpal etýin suraǵan. Sol hattyń mátini men hatqa qol qoıǵandar tizimin oqyrman nazaryna usynyp otyrmyz.

Qazaqstan Respýblıkasynyń prezıdenti Q.K.Toqaevqa

Qurmetti Qasym-Jomart Kemeluly!

M.Áýezov atyndaǵy Qazaq memlekettik akademııalyq drama teatry elimizdegi mańyzdy mádenı oshaqtardyń biri ekendigi ózińizge málim. Kórermenderdiń rýhanı damýyna úles qosyp kele jatqan qarashańyraqtyń jańa belesterdi baǵyndyrýynyń basty kepili turaqtylyq ekeni de daýsyz. Kásibı mádenıettiń qaınar bulaǵy bolǵan M.Áýezov atyndaǵy Qazaq Memlkettik akademııalyq drama teatry – elimizdiń «Ákemteatry». Ákemteatr qarashańyraǵynan óziniń enshisin alyp, Abaı atyndaǵy Opera jáne balet teatry, Jambyl atyndaǵy Qazaq memlekettik fılarmonııa jáne elimizdiń teatrlary shańyraq kóterip, qazirgi ýaqytta memleketimizdiń mádenı qoǵamynyń qalaýshysy bolǵanyna tarıh kýá.

2019 jyly M.Áýezov teatry eńsesiniń kóterilýi, shyǵarmashylyqtyń qaıta jandanýymen qatar teatr sharýashylyǵynyń bir júıege kelýi – uıymnyń dırektory Ábdihalyqov Sábıt Ábdimútáliulynyń kelýimen tyǵyz baılanysty. Sebebi, teatr basshylyǵyna kelgen bir jyl ýaqyttyń ishinde shyǵarmashylyq ujymǵa erkindik bere otyryp, jańa jobalarǵa qoldaý kórsetti, teatr repertýary  sátti qoıylymdarmen tolyqty. Halyqaralyq festıvalder men gastrolder uıymdastyrdy. Bir jyl ishinde kórermender sany 30%-ǵa ósýi, ár qoıylymdarda kórermen zalynda orta eseppen 70% bolýy, elimizdiń basqa teatrlarymen salystyrǵanda bul salada úzdik ekenimizdi aıtqymyz keledi. Teatrdyń jalpy óndiristik tıimdiligi 20%-ǵa artty. Sonymen qatar, qyzmetkerlerge áleýmettik salada oń jaǵdaı jasalyp, birneshe márte syıaqylarǵa ıe boldyq. Teatrdyń uzaq jyldar boıy jınalǵan mıllıondaǵan qaryzynyń tolyqtaı jabylýyna, teatrdyń ımıdjiniń kóterilýine, teatr qyzmetkerleriniń qajetti jabdyqtarynyń qamtamasyz etilýine jáne usynys-talaptarynyń oryndalýyna múmkindik jasap otyrǵan dırektorge ujym dán-rıza. Dıplomatııalyq qabiletiniń arqasynda sport keshenderinde teatr qyzmetkerlerine sport túrlerimen aınalysýyna tegin qatysý múmkindik jasady. Bul jasalyp jatqan jumystardyń tek bir jyl ishinde atqarylǵan jemisi!

Búgingi kúni de, teatr ishinde turaqtylyq pen shyǵarmashylyq damýǵa degen úlken senim paıda bolyp otyr. 2019 jylda qoıylǵan barlyq maqsattar men josparlar artyǵymen oryndalyp, teatrdyń ósýine, jańa deńgeıge shyǵýyna jol ashyldy. Óziniń ıgi bastamalarymen tek qana teatr ǵana emes, sonymen qatar áleýmettik, qaıyrymdylyq sharalarynyń ózi joǵary dárejede ótkizilýi – teatrymyzdyń mártebesi artyp, kóshbasshy teatr ekenin dáleldeýde. Teatrda tarıhynda kóptegen basshylar boldy. Qazirgi zamannyń jańa formattaǵy zamanaýı úzdik teatr menedjeri retinde QR eńbek sińirgen qaıratkeri, «Daryn» memlekettik syılyǵynyń ıegeri, Jastar Odaǵy syılyǵynyń laýreaty Sábıt Ábdimútáliulyn aıtýǵa tolyq negiz bar. Ǵ.Músirepov atyndaǵy Qazak memlekettik akademııalyq jastar jáne balalar teatryndaǵy 4 jyldyq eńbeginiń arqasynda atalmysh teatrdyń jańa beleske kóterilýine jaǵdaı jasalǵanyna kýámiz.

Qurmetti Qasym-Jomart Kemeluly! Osy oraıda, teatr basshylyǵynyń aýysýyna qatysty áńgimeler osymen 6-7 aıdyń kóleminde júrip jatqanyn jetkizgimiz keledi, «Jańa basshynyń kelýi múmkin» degen sózder ujymda kóptegen suraqtar týdyryp otyr. Ujym bir basshymen jumys isteýine endi úırene bergende, aýystyryp jiberetin «dástúr» qalyptasty. Jańa basshy kelmeı jatyp, ony da jaqyn arada taǵy da aýystyrady degen sóz shyǵatynyna etimiz de úırenip ketti. Bul faktor teatr jumysynyń atmosferasyna, óndirisine keri áserin tıgizip keledi. 94 jyldyq tarıhy bar  Basshylyqtyń jıi aýysýy ujymda turaqsyzdyq týdyryp, qolǵa alynǵan isterdiń aıaqsyz qalýyna alyp keleri sózsiz. Bas teatrǵa bul áreket óte jarasymsyz.

Qurmetti Qasym-Jomart Kemeluly! Endi mine, 1 jylǵa jýyq qyzmet atqarǵan Sábıt Ábdimútáliuly Ábdihalyqovty laýazymnan bosatady degen áreketter Sizge hat jazýdy májbúrlep otyr. Dırektordy qandaı sebeppen laýazymnan alyp tastaıtyny belgisiz. Taǵaıyndalatyn jańa dırektordyń qandaı sebeppen qoıylyp jatqanyna da bizge beımálim. Dırektordyń densaýlyǵyna baılanysty laýazymynan bosatý týraly aryzy májbúrli túrde jasalǵan dep esepteımiz. Ujymnyń kókeıin mazalaǵan osy suraqtarǵa jaýap alý maqsatynda QR Mádenıet jáne sport mınıstri A.R.Raıymqulovaǵa hat joldadyq.

Qurmetti Qasym-Jomart Kemeluly! Tıimdi memlekettiń negizi – memleket pen halyq arasyndaǵy senimdi qarym-qatynas. Qazaqstan halqyna úndegen joldaýyńyzda «Estıtin memleket» tujyrymdamasy – halyq tarapynan áreket etetin bılikke degen senimdi ornatý men nyǵaıtýǵa negizgi ekpin jasalatyn basty strategııalyq element ekenin atadyńyz. Bizdiń ujymdy da estıdi, tyńdaıdy degen úmittemiz.

Qurmetti Qasym-Jomart Kemeluly! Biz M.Áýezov atyndaǵy Qazaq memlekettik akademııalyq drama teatry ujymy QR eńbek sińirgen qaıratkeri Sábıt Ábdimútáliuly Ábdihalyqovtyń eńbegine rızashylyǵymyzdy bildire otyryp, Sizden dırektordyń óz laýazymynda qyzmetin jalǵastyrýyna yqpal etýińizdi suraımyz.

Asa qurmetpen, QR Halyq ártisteri QR eńbek sińirgen qaıratkerleri

 

Sońǵy jańalyqtar