13 Aqpan, 15:39 1172 0 Jahan Anar LEPESOVA

Ózbekstan bıligi Qazaqstanda oqıtyn stýdentterin jappaı qaıtaryp jatyr

Ózbekstan bıligi Qazaqstan jáne Tájikstanda oqıtyn stýdentterin qaıtaryp jatyr. Memleket Ortalyq Azııanyń ózge elderinde bilim alyp júrgen azamattaryn da qaıtarmaq. Bul týraly Ortalyq Azııanyń jańalyqtar qyzmeti habarlady. 

Shymkentte oqyp jatqan 15 myńǵa jýyq ózbek stýdenti jappaı qujattaryn qaıtaryp alyp jatyr. Derekkózdiń habarlaýynsha, olar kezektiń tym kóptiginen úlgermeı jatqanyn aıtqan. Ózbek bıligi shetelde oqyp jatqan stýdentterdi Ózbekstandaǵy joǵary oqý oryndaryna esh emtıhansyz aýystyratynyn málimdegen.

Qazaqstannyń joǵary oqý oryndarynan qujattaryn keri qaıtaryp alyp jatqandardyń deni — syrttaı nemese qashyqtyqta onlaın oqıtyndar. Olardyń arasynda jasy eresek azamattary da bar.

"Men Shymkentte oqımyn. Jasym 52-de. Ózbekstan azamatymyn. Elde joǵary bilimsiz jumys isteý múmkin emes. Sol úshin osynda oqýǵa kelgem. Endi prezıdent Mırzııaev elge shaqyryp jatyr. Qazir qujattaryn alyp jatqan adamdar óte kóp. Bári úlgermeı jatyr",- deıdi Mýhtabar Omonova esimdi áıel.

Joǵary oqý orny oqytýshylary qoldan kelgeninshe kómektesip jatqanyn, biraq kezektiń tym kóptiginen úlgermeı jatqanyn aıtady. Qujattaryn kaıtaryp alǵysy keletin stýdentterge qoıylatyn basty talap — qaryzy bolmaýy kerek.

"Bizde 7 myńnan astam stýdent bar. Biz mundaı ajıotaj bolady dep oılamadyq. Biz qazir olardyń qolyna tek transkrıpt berip jatyrmyz, qujattardyń ózi muraǵatta saqtalady. Eger olardy Ózbekstan qabyldamasa, qaıtyp kelip oqýyna bolady",- deıdi Shymkenttegi M. Áýezov atyndaǵy memlekettik ýnıversıtet prorektory Sadybek Beısenbaev.

Tájikstanda oqyp jatqan ózbek stýdentterine ondaǵy oqý oryndary Ózbekstannyń Ulttyq reıtıngi tiziminde joq ekenin aıtqan. Demek ondaǵy bilim sapasy da kúmán keltiredi degen. Al Qazaqstandaǵy jaǵdaıǵa baılanysty sebebi túsindirilmedi.

Tegter Ózbekstan

Sońǵy jańalyqtar