20 Qańtar, 12:00 296 0 Jańalyqtar Asyl TUMAR

Elimizdegi avtokólik joldarynyń 34 paıyzy sapaly hám qanaǵattanarlyq

Sýret ǵalamtordan alyndy
Sýret ǵalamtordan alyndy

Qazaqstanda sapa turǵysynan birinshi jáne ekinshi sanattaǵy jol úlesi 34 paıyzǵa deıin jetti, – dep  jazdy QazAqparat.

Indýstrııa jáne ınfraqurylymdyq damý mınıstrliginiń byltyrǵy jylǵy qorytyndysyna sáıkes, búgingi tańda respýblıkalyq mańyzy bar avtokólik joldarynyń 8,2 myń shaqyrymy birinshi jáne ekinshi tehnıkalyq sanatqa jatqyzylǵan. 2025 jylǵa qaraı bul kórsetkish Qazaqstandaǵy búkil joldyń 60 paıyzyna jetkizilmek.

«Infraqurylymdy damytýǵa baǵyttalǵan «Nurly jol» baǵdarlamasynyń ótken besjyldyǵy avtokólik joldarynyń 3 myńnan astam shaqyrymyn qurylys jáne rekonstrýkııalaý jumysymen qamtýmen este qaldy. Sondaı-aq, 2015 jáne 2019 jyldar aralyǵynda respýblıkalyq mańyzǵa ıe joldardyń shamamen 7 myń shaqyrymy men jergilikti mańyzy bar joldardyń 15 myń shaqyrymy jóndeldi. Bul óz kezeginde el óńirleriniń qoljetimdiligin jaqsartýǵa múmkindik berip, aımaqtardyń áleýmettik-ekonomıkalyq damýyna serpin bergeni sózsiz», – delingen mınıstrlik habarynda.

Tutastaı alǵanda, Qazaqstanda qozǵalys qarqyny táýligine 300 kólikten bastalatyn birinshi jáne ekinshi sanattaǵy jol uzaqtyǵy byltyrǵy kórsetkishpen salystyrǵanda 34 paıyzǵa jetti.

Jańa «Nurly jol» baǵdarlamasyna sáıkes, bul kórsetkish bes jyldan keıin shamamen eki esege artpaq. Osylaısha, barlyq respýblıkalyq mańyzy bar avtokólik joldarynyń jaǵdaıy jaqsy jáne qanaǵattanarlyq bolady dep josparlanǵan.

Eske salaıyq, búgingi tańda respýblıkalyq mańyzdaǵy avtokólik joldarynyń 88 paıyzy joǵaryda atalǵan sapa sanatynda. Sonymen qatar, 2025 jylǵa deıin oblystyq jáne aýdandyq mańyzǵa ıe joldardyń 27 myńnan astam shaqyrymy jóndeledi. Tıisinshe, jaqsy jáne qanaǵattanarlyq jaǵdaıdaǵy jergilikti joldar jelisiniń úlesi 95 paıyzǵa jetkizilmek.

Sońǵy jańalyqtar