17 Qańtar, 15:43 695 0 Rýhanııat Tańsulý ALDABERGENQYZY

Adamnyń búkil ǵumyry saǵynyshtan turady

Nurasy men Aqsýy jarysa aqqan osynaý aýyl bala kezimnen kóz aldymda. Ásirese, aýyl shetindegi, eń bıik qyr basynda turǵan Hamza aqsaqaldyń qarasha úıi... Sol bosaǵada bulańdap ósken shal men kempirdiń jalǵyz qyzy, jýan qos burymy tilersegine soǵylyp, ádemi  bota kózderi jylylyq shashyp turatyn sulý boıjetken kóp jigittiń armanyna aınalǵanyna da kýámiz.

Keıinnen onjyldyqty biti­rip, arman qýyp ásem astana­myzǵa kel­gende de, dál sol kórinis kól­beń­dep aldymyzdan shyqty. Bala kezimizde aýdandyq, oblystyq gazet betterinen únemi kórip, izdep, oqyp júretin osy bir aıaýly jan­nyń arman ar­qalap, ýnıversıtet ta­­baldyryǵyn attaǵanda aldy­myz­dan jarq ete qalýy, árıne, bala qııal jaqsy bir yrymǵa balap, qa­nattana túskenimiz bar.

– Oı, Aıýlydaǵy kishkentaı til­shi qyz sen be ediń? – de­gende jylap jiberýge shaq qal­­ǵa­nym da áli esimde. Sodan bas­­tap, jýrnalıst maman­dy­ǵyna degen qush­tarly­ǵymyz, bala mahabbatyma aınal­ǵan uly qumarlyq óz degenine jetkenshe, aragidik bolsa da osy bir mi­nezi jumsaq, júregi jy­ly jan­men syılasyp kele jat­­qa­ny­myz da bir baqyt. Onyń jó­ni de bar edi.

Búginde «Qazany men qalamyn qa­­tar ustap» kele jatqan Klara Ham­­zaqyzy, búkil qazaqtildi aq­pa­rat quraldarynyń abyz atasyna, aqsaqalyna aınalǵan Namazaly Omashulynyń jary, sol áýlet­tiń ıbaly kelini ǵana emes, aqyl­man ene, meıirimdi áje. Óz ba­sym asa qadir tutatyn, úlgi tu­ta­tyn ustaz.

Ádettegi maqsat – elimizdiń áde­­bıeti men mádenıetinde, óne­rin­­de, sóz ónerinde zııaly minezimen, qarymdy qalamgerligimen, ula­ǵatty ustazdyǵymen abyroı be­­­lesinde kele jatqan azamat­tar­dyń jarynan suhbat alý dás­túri­niń tizginin osy bir otbasyna qa­raı burǵandy jón sanadyq.

– Klara Hamzaqyzy, sonaý jetpisinshi jyldardyń orta tusy men sekseninshi jyldardan beri qaraı qazaq basylym­da­rynda qyzmet etip kele jat­qandar arasynda professor Namazaly Omashulynyń esi­mi óte syıly. Sizdiń arala­ryńyz­daǵy syı qalaı bastalyp edi?

– Qazaq jastarynyń kópshiligi oqýshy, mektep qabyrǵasynda júr­gen kezinen-aq Almatydaı ásem qalada oqymaq túgili, jazǵy de­malys kezderinde kelip qy­dyrý­dy armandamaǵan bala bolmaǵan shy­ǵar áste. Men de Shet aýdany­nyń ortalyǵy Aqsý-Aıýly aýy­lyn­daǵy Y.Altynsarın atyndaǵy orta mektepte oqyp júrip, bala kezden arman bolǵan jýrnalıst mamandyǵyn qaladym. Ańsarym – Almaty boldy. Óıtkeni jýr­nalıs­tıka fakýlteti qazirgideı emes, jalǵyz KazGý-de ǵana. Qazaq áde­bıetiniń klassıkalyq shy­ǵar­malaryn, ańyzdaryn, aqyndary­nyń jyr-poemalaryn jattap, so­lar syndy qalamger bolsam dep ar­mandadym. Jergilikti, oblys­tyq gazetterde mektep ómirinen habar-jańalyqtar jazyp júrip, odan saıyn janyma jaqyn tart­tym. Qyz-kelinshekter ómirinen, adamı tirlikten kóp maǵlumat be­rip, jaqsy dúnıelermen shyǵyp turatyn «Mádenıet jáne turmys» degen jýrnal boldy, soǵan jarııa­lanyp turatyn. Menen eki jyl buryn mektep bitirip, Almatyǵa ket­ken aqshataýlyq bir qyzben hat jazysyp, aralasyp tura­tyn­myn. Sol arqyly jýrnalıstıkaǵa baılanysty biraz kitaptar aldyryp oqyp, ózimshe «daıyn jýrnalıst» sekildi keýdeme nan pisip júr­gen sátter ǵoı. Keıin jýr­na­lıs­tıka teorııasynan dáris oqy­ǵan ustazymyz Taýman Aman­do­sov­tyń osy attas kitabyn da to­ǵy­zynshy synypta oqyp shyqtym. Sóı­tip júrip, mektep bitirdik. Jaq­sy oqydym. Kúmis medalmen bi­ti­rip, Almatyǵa tarttym ǵoı. Ákemniń jalǵyz qyzymyn, erkemin. Nebári on altydamyn. Son­dyq­tan ákem jibergisi kelmedi, sol oqýyń myna Qaraǵandyda joq pa, jaqyn jerde oqyǵanyń oń bolar edi dep qarsylyq bildirdi. «Ondaı oqý Qaraǵandyda joq» deımin ǵoı, «Ol neniń oqýy sonsha?» dep ol kisi de bolmaıdy. Jibergisi joq. «Korrespondent bolamyn» dep qoıamyn.

Bul 1969 jyl. Armandaǵan oqýy­ma qabyldandym. Ol kezde joǵary oqý ornyna qabyldanǵan stýdentter tamyz-qyrkúıek aılarynda aýyl sharýashylyǵy jumy­syna attanyp jatady. Biz de ýnı­versıtet janyna jınalyp, sha­ǵyn avtobýsqa jaıǵasa bas­ta­dyq. Kýratorymyz, marqum Ábil­faıyz Ydyrysov, ol kisini zaıyby Zarıa apamyz shyǵaryp salyp turdy. Oqýǵa qabyldanǵan elý balanyń ony – qyz. Áli tanysyp ta úlgermegenbiz. Pysyqtaýlar áń­gimege kirisip ketken. Men ońa­shalaý jerge jaıǵasyp, ózimmen ózim otyrdym. Tomaǵa tuıyqtaý boldym. Bárimiz túgel emes sekildimiz, bireýdi kútip turǵan bolýymyz kerek. Júretin túri joq. Júr­gizýshi de, aǵaıymyz da alaq­tap, jan-jaǵyna qarap eleńdep tur. Bir kezde moınynda gıtarasy bar, shashyn tyqyrlap aldyryp tas­taǵan bir bala júgirip kelip avto­býs­qa kirdi. Sóıtsek, sol stýdentti kút­ken ekenbiz. Aǵalaryńdy al­ǵash ret osylaı kórdim.

– Sonymen...

– Almaty oblysy Panfılov aýdanyna qarasty Penjim degen jerge júgeri terýge kettik. Alǵash­qy kúni demaldyq ta, tańerteń tek­seris-tanystyq bastaldy. Bári­mizdi aty-jónimizben atap, alǵa bir qadam shyǵamyz da, ornymyzǵa turamyz. Men de ornyma tura ber­genimde álgi bala jetip kelip: «Sen tarıh páninen qulap qalyp ediń ǵoı, qalaı oqýǵa tústiń?» demesi bar ma?.. «Qalaı túskeni nesi, ká­dim­gideı tústim». «Joq, sen tarıhtan qulap qalǵansyń, meniń aldymda otyryp jaýap bergensiń» dep bolmaıdy. Men de «Joq, qula­ǵanym joq, men tarıhtan tórtke jaýap berdim» dep bolmaımyn. Sodan álgi jerde ózimniń emtıhandardy jaqsy tapsyrǵanymdy, oqý­ǵa óz kúshimmen túskenimdi dá­­­leldeı almaı, ábden jylaǵym kelip, yza boldym. Tipti, yza bol­ǵa­nym sonsha kózimnen jas ta shyqpaıdy, jylaı da almaımyn. Osy áńgimeden keıin álgi balany qa­raptan-qarap tıiskeni úshin, maq­tanshaqtyq tanytqany úshin jek kórip kettim. Bekerden-beker ke­lip «urynǵany» úshin jek kór­dim.

Keıin aıtady ǵoı, sol kezde Qarqaralydan Raıhan Nurshına degen qyz da qujattaryn tapsyryp, em­tıhannan qulap ketken edi, meni sonymen shatastyrypty. Biz­diń jaqta tegimiz «ınalarmen» aıaqtalatyn bolǵandyqtan, shatas­tyrsa kerek. Onyń ústine túri­miz­de de uqsastyq bolǵan bolýy ke­rek. Sabaq bastalǵan soń ol top­tyń starostasy, men komsorg bo­lyp, bir topta oqydyq. Birge oqy­ǵan soń, túrli stýdenttik jıyn­darǵa birge baramyz degendeı, onyń ústine óte ótkir, sym­bat­ty, talǵammen kıinetin sánqoı boldy. Sabaq úlgerimi óte jaqsy, uıymdastyrýshylyq qabileti de, mý­zykadan da quralaqan emes, dom­byra men gıtaranyń qulaǵyn­da oınaıdy, án salatyny taǵy bar. Qoıshy, áıteýir, kópshiliktiń kózi men qulaǵynda júrgen osy bir jigitpen aramyzda ádemi bir sezimniń qalaı bastalǵanyn da bilmeımin, bir-birimizsiz ómir súre almaıtyn jaǵdaıǵa jettik.  Shańy­raq kótergen jastardyń bári ol kezde komsomoldyq toı ja­saıdy, biz de osylaı otaý qur­dyq. Sol jyly Almatydaǵy Neke saraıy jańadan ashylǵan. Bas qosyp jatqan jastardyń kóptigi son­sha, kezegimiz 22 naýryzǵa qoıyl­dy. Shaǵyn ǵana, qazirgideı asta-tók zaman da emes qoı. Búgin­de Jandosov pen Rozyba­kıevtiń qıylysyndaǵy meshittiń ornynda kishigirim meıramhana bolatyn-dy. Ustazdarymyz, birge oqyǵan jol­dastar bar, aýyldan kelgen bi­ren-saran aǵaıyndar bas qosyp, atap óttik. Ol 1972 jyldyń basy, 3 kýrs bastalǵan jyl edi.

Tuńǵyshymyz Qarlyǵash áke­siniń aýzynan túsip qalǵandaı, ádemi edi. Stýdentpiz, páter jaldap turamyz. Onyń ústine jaspyn, on toǵyz jastamyn, tósimnen onsha sút te shyqpaıdy, sodan aýyl­ǵa, Merki aýdanynyń Oıtal aýy­lynda turatyn eneme aparyp tastadyq. Jastyqpen qalaı bolsa, solaı júrdim be, bilmeımin, sodan qatty aýyryp, oqý da, bala da jaıy­na qaldy da, uzaq ýaqyt aýrý­hana­da jattym. Odan keıin de em­delip júrip aldym. Qyzymdy qat­ty saǵynamyn, jylaımyn, kór­gim keledi. Ol kezde telefon da joq, uzaq-sonar hat jazamyn. Bir­de enem balany jylylap orap alyp, aýdan ortalyǵyndaǵy sa­lon­ǵa baryp, kishkentaıdy sýretke túsirip salyp jibergeni bar. Óki­nishke qaraı, ákesi ekeýmizge tuńǵyshymyzdy qushaǵymyzǵa alyp, qyzyqtaýdy jazbapty. Segiz aılyq kezinde kóz tıip shetinep ketti. Osyndaıda bolmasa, ol tý­ra­ly aıta da bermeımiz.

Osylaı, endi birer jyldan keıin shańyraq kótergenimizge, bir shańyraqtyń astynda ǵumyr ke­ship kele jatqanymyzǵa jarty ǵa­syr bolmaq. Bir qyz, eki uldan tara­ǵan nemerelerimizben birge sol bir jaqsy kúnderge jetsek de­gen nıetimiz bar.

– Sizdiń «Qımaımyn seni, qy­zyl úı» atty kitabyńyzdy oqyp otyryp, ózińizdiń ádemi bir otbasylyq úrdisińizdiń qo­rytyndysyndaı sezindim...

– Sózińdi túsindim. Anamyzdan ke­re­met qalamger bolyp týmasaq ta, qazaqtyń ańyz-áńgimeleri men jyr-dastandaryna degen, jalpy áde­bıetine degen qushtarlyq bolar, osy bir salany janymyz qa­la­­ǵany. Kez kelgen qazaq qyzy, qa­zaq kelini, qazaq áıeli sekildi men de otbasym men otaǵasyn birinshi kezekke qoıǵan janmyn. Ásirese, qyz balanyń turmys qur­ǵannan keıingi búkil bolmysy adal, jaqsy jar bolyp qana qoı­maı, urpaq jalǵastyrýshy, ol urpaqty ómirge ákelip qana qoımaı, onyń shyr etip ómirge kel­gennen bastap óz qoly óz aýzyna jetkenine deıingi tálim-tárbıeniń de jaýapkershiligi qoıýlana túsetini biz ashqan pál­safa emes. Urpaqtan-urpaqqa jal­­ǵasyp kele jatqan qazaq hal­qy­nyń salt-dástúri, úlgi-ónegesi. Tálim-tárbıesi. Qyzmetten alshaq­tap, bala kútimimen otyrǵan kez­deri ózime osyndaı bir «qyzmet» taýyp aldym. Jaqyndarymnyń, balalarymnyń týǵan kúnderinde, ataýly tarıhı merekelerde úıdiń bir qabyrǵasyn alatyn «Shańy­raq» gazetin shyǵaryp turatyn­myn. Alǵashqy kezde jazý-syzýdan qalys qalmaý, bos ýaqyt ótkizý úshin jasaǵan bul ádet birte-birte ká­dimgi turaqty jumysyma aınaldy. Onda fotoreportaj, ádemi ázil, sypaıy qaljyńǵa qurylǵan qa­ra sóz nemese óleńmen órilgen ti­lek­ter, qolmen salynǵan sýretter ózime, otaǵasy, balalaryma ǵana emes, kelip-ketip jatatyn aǵaıyn­darǵa, mereke, týǵan kún­deri bas qosatyn dos-jarandarǵa da qatty unaıtyn. Qabyrǵa gaze­tiniń betindegi árbir sýret tarıhy­na, ádemi bir sezimmen jazylǵan es­te­likterge, tipti júrekjardy tilekterge shuqshııa qarap, kóz­de­rin almaı oqyp, dastarqandaǵy as sýyp qalatyn kezder de az bolmady. Qazir ol gazet jýrnalǵa aınal­ǵan, qabyrǵaǵa ilmeı, ústel ústin­de jatady. Ótken jyldyń sońǵy 56-nómiri atalarynyń mereıtoıyna arnaldy. Degenmen baıaǵy jas kezimdegideı emes, sondyqtan nemereniń birine otbasylyq basylymnyń tizginin berý kerek shyǵar dep oılap júrmin.

– Osy atalǵan kitaptyń bi­rin­shi betindegi: «Alla Taǵala óziniń quldaryn ózi syılaǵan ja­ryq dúnıede áldeneshe ret sy­naqtan ótkizedi eken. Sondaı synaqtan ótip kele jatyrmyz desek te, sońǵy synaq – bul ómirde densaýlyqqa jeter esh­teńeniń joq ekenine kózi­mizdi jetkizgen aýyr synaq boldy» degen tirkester bizdi de qat­ty tolqytqanyn jasyr­ǵym kelmeıdi. Búginde bári art­ta qalsa da, sol jyldarǵa, ekeýara ádemi dıalogtan qu­ryl­ǵan osy kitapqa tereńirek toqtalsaq...

– «Qyz-Ǵumyrdan» keıin ja­ryq­qa shyqqan «Qımaımyn seni, qy­zyl úı» shyn máninde, juptas­qan ǵumyrymyzdaǵy árbir qımas shaqtardy eske ala otyryp, bala­lyq shaqqa saıahat jasaǵan dúnıe boldy. Nákeńniń aýyr otadan keıingi kóńil aýanyn ómirimizdiń shýaqty shaqtaryna, kez kelgen adam balasy syndy boıymyzdy ker­negen balalyq shaqqa, jastyq shaqqa degen saryala saǵynyshy­myz­dy qaǵaz betine túsirýdi maq­sat tuttym. Ekeýara Kóksheniń qońyr samalyna janymyzdy jel­pi­tip, júregimizdi baıaý terbegen «Shortandy» kóliniń tol­qyn­dary ekeýmizdiń de janymyzdy ádemi bir áldı besikke salyp, ter­begendeı kúı keshtik. Áńgime tizgini – aǵalaryńda, ony janaryma kelip qalǵan ystyq monshaq­tar­ǵa qaramaı, kókirek saraıyma syıdyryp kele jatqan – men.

«Saǵynysh – adamnyń ótken kún­derinen qol úzdirmeıtin erekshe sezim. Adamnyń búkil ómiri sa­ǵynyshtan turatyndyqtan da este­likti «Máńgilik saǵynysh» dep ataýǵa kelistik. Sol jylǵy dema­lys­qa ketken árbir kúnimiz alysta qalǵan balalyqtyń baqshasynda alańsyz bala bolyp oınadyq, jas bolyp jelpindik desem, artyq aıt­qandyq emes. Bir sózben aıt­qanda «aýrýdy aýylymyzdan alys­tataıyqshy» degen maqsat-nıe­timizge jettik dep oılaımyn. Nákeńniń aýzynan shyqqan árbir sózine, keıde tolqyp, keıde bolmashy ǵana jymıǵan juqaltań júzine qarap, men de, ol da ájep­táýir jeńildep qaldyq. Jazý de­gen­niń rahaty da osy emes pe?!

– Shynynda da, sizderdi jaq­sy biletinderdiń qata­ry­nanmyn, degenmen ustazy­myz­dyń ashyla, jarqyldaı kúl­ge­nin sırek kórippin. Sizge jas, bozbala Namazaly emes, bú­gin­de qazaq jýrnalıstıkasynyń atasyna aınalǵan ustaz, professor, akademık Namazaly­nyń qandaı minezi unaıdy? Ja­nyńyzdy aýyrtatyn qy­ly­ǵy da bar shyǵar?..

– Óz basym atanyń kúshi, ana­nyń aq sútimen berilgen Jaratý­shy­nyń syıy – kórkem minez, keı­bireýlerde ǵana bolmasa, asa óz­gere, qubyla qoımaıdy dep oı­laı­myn. Qazaqta «Súıekke bitken minez – súıekpen ketedi» degen na­qyl bar, Nákeńniń mineziniń turaq­tylyǵy, oıyna alǵan tirli­gin tez ári tııanaqty jasaıtyny, ómirge, aınalasyndaǵylarǵa kóz­qarasy, unamaǵany bolsa betke aıta salatyn ádildigi, birbetkeıligi bar. Betiń bar, júziń bar de­meı­tini, bir sózben aıtqanda táýe­kelshiligi – áý bastan qalyptasqan minez. Oılanyp-tolǵanyp júrip almaıdy, tez sheshim qabyldaıdy. Ádi­letsizdikke jany qas. Eń­bek­qor. Erinbeıdi. Talapshyl. Ózine de, bizge de. Kemshiliksiz adam bolmaıtyny taǵy bar. Jasyraq ke­zinde «aıttym, boldy», «úzildi-ke­sildi», degendeı, óz aıtqanymen ǵa­na júretin. Keı sheshimderi durys bolmasa da, men qarsy bolmaıtynmyn. Ásirese, balalardyń aldynda qarsylyq bildirgen emes­pin. Sondyqtan da ol kiside «meniń aıtqanymnyń bári durys» degen oı qalyptasqan bolar. Pedanttyq basym. Qazir meniń de, balalardyń da pikirine qulaq asyp, sanasady.

Klara Hamzaqyzy ózine ǵana tán ádemi bir jymıysymen eriksiz kú­­­­lip aldy. Biz de biraz únsizdikten keıin áńgimemizdi urpaq, áýlet jaıy­­­na qaraı burǵandy jón kórdik.

– Qazaq jýrnalıstıkasyna ólsheýsiz úles qosqan ustaz­dyń bala-nemereleri qaı tilde sóı­lep, oqıdy eken?

– Bala-nemerelerimiz túgeldeı qa­zaq balabaqshasy men mektebinde oqydy. Nemereler de qazaq mek­tebinde oqyp jatyr. Qalada týyp, qalada óskendikten, árıne aýla­daǵy «tárbıege» orys tili ara­las­paı bolmaıdy eken.

– Joǵaryda tilge tıek etken atalarynyń boıyndaǵy qa­­sıetterdi qaı nemeresinen baı­qaısyz?

– Ol jaǵynan qan jibermeıdi deýge bolady. Nurǵalymnyń uly Erdýlattyń qaǵylezdigi, oıyna alǵan tirligin orta jolda tastap ket­peıtini, eńbekqorlyǵy uqsaı­dy. Dostarynyń arasynda beınebaıan túsirip, búginde úsh júzden asa oqyrmany bar. Dombyranyń qula­ǵynda oınaıdy, án aıtady. Nurjalǵastyń Arslany da óte uqypty bolyp ósip keledi. Jına­qy, ústeliniń ústinde artyq nárse jatpaıdy, qyl jýytpaıtyn ta­zalyǵy bar, al qyzy Adına sýret salýdyń sheberi. Shyǵarmashylyq jaǵyna beıim. Astananyń Oqý­shy­lar saraıynda birneshe márte kór­mesi uıymdastyryldy. Kenje nemere Andasymyzdyń bárimizdi úıirip alatyn lıderligi basym. Eki uldyń úlkeni Áselimizdiń Mınıkasy (Múnevver) Shveııanyń Geteborg ýnıversıteti Halyqaralyq qatynastar fakýltetiniń stýdenti. Túrkııada qazaqtyń salt-dás­túrin nasıhattap júrgen boıjetken. Al uly Erasyl men Nurǵalym­nyń Madııary sportqa jaqyn. Son­dyqtan da atalary syndy shy­­­ǵarmashylyqqa beıim deýge bo­lady. Eshqaısysy da ónerden qura­laqan emes. Qaı-qaısysy da eń aldymen atasymen aqyldasyp, keńesip otyrady.

– Aǵamyzdyń bilimdar­ly­ǵy­­men qosa, óte salmaqty, zııa­lylyǵy aldynan dáris al­ǵan kóptegen jasqa úlgi. al ol kisiniń qos ananyń qabaǵyna qarap, olardyń sózin bólmeı, aldynan kese kóldeneń ótpeı mápelegenin bireý bilse, bireý bilmes...

– Ol ras. Anam Saqypty ákem ómirden ótken soń, jalǵyz qal­dyr­maı qolymyzǵa kóshirip alǵa­nymyzdy, sóıtip bizben otyz jyl­ǵa taıaý birge ǵumyr keshkenin, árı­ne jaqyn aralasyp júrgender jaq­sy biledi. Jaryqtyq anam: «Aı­nalaıyn, Namazym, aman bol­syn­shy, til-kózden saqtasynshy», – dep aınalyp-tolǵanyp otyratyn-dy. Nákeńniń bilimdarlyǵyna aqyl-parasaty qosylyp, osy kúngi qandaı qoly jetken je­tistigi bolmasyn enemniń aq súti­niń, emirene júrip bergen tá­lim-tárbıesiniń arqasy der edim. Iri deneli, zor kisi edi jaryqtyq. Kóp sóılemeıtin. Tomaǵa tuıyq. Bi­raq áńgime arasynda ezý tartqy­zar jaqsy bir ádeti bar edi. On­shaq­ty qursaq kótergen batyr ana, basqa perzentterinen Nákeńdi erek­she jaqsy kórdi, maqtan tut­ty. Aýyldan saǵyna kelip, aýnap-qý­nap, arqa-jarqa artynyp-tartynyp máz bolyp ketetin. Nákeń de anasynyń kóńiline tıgen jeri joq. Únemi sózin bólmeı tyńdap, sanasyp otyratyn. Tórdegi qatar turǵan eki ústel, birinde enesi, birinde óz sheshesi otyrysymyzdyń sáni edi. Olarmen as ishýdiń ózi, shúıirkelesip, qaljyńdasyp otyryp ishetin shaı qandaı deseńizshi?! Enem aýylǵa ketken soń da ol kisi otyrǵan oryndyqqa álsin-álsin qarap qoıatyn, ondaı kezde anasyn saǵynyp qalypty-aý degen jyp-jyly meıirim meniń de boıymdy, sanamda sharq uryp, belgisiz bir kúı keshýshi edi. Anasyn syılaǵan, anasyna degen perzenttik mahabbaty júregin jylytqan azamat bolǵandyqtan bolar, meniń anamdy da óz anasynan kem kórmeı, úne­mi alaqanynda ustap, balasha má­pelep, máńgilik saparyna arýlap shyǵaryp saldy. Qos anamyz­dyń da bul fánıden kóshkenine biraz jyldardyń júzi boldy, biraq appaq meıirimge toly júz­deri júrekten de, kóńilden de kósh­ken joq...

«Qaıran bizdiń Analar ardy oı­laǵan» degendeı, osynaý qazaq­tyń qarapaıym qyzynyń, ıisi qazaqqa aty máshhúr, onyń ishinde qazaq jýrnalısteriniń ula­ǵatty ustazy Namazaly Omashuly shańy­raǵynyń máńgilik shamshyraǵyna aınalyp kele jatqan Klara ha­nymǵa qarap otyryp, er-azamatyn ómir tiregine aınaldyryp qa­na qoımaı, bir ǵana áýlettiń, bir ǵa­na aýyldyń azamatyna aınal­dy­ryp qoımaı, barlyq múmkin­di­gin jasap, baǵyn da, jolyn da ashýy, qazaq áıelde­rine ǵana tán qasıet ekenin taǵy da moıynda­ǵan­daı boldyq...

 

Suhbattasqan

Tańsulý ALDABERGENQYZY

Sońǵy jańalyqtar