17 Qańtar, 10:41 711 0 Atajurt Túrkistan Gazeti

Murattyń máselesi nazarǵa alyndy

Halyqaralyq Túrkistan  gazetiniń qandastarǵa arnalǵan ATAJURT jobasy aıasynda, gazettiń ótken sanynda (№1/ 9 qańtar 2020) 32 jyl boıy qolyna bir de bir qujat tımeı júrgen Murat esimdi jigit jaıynda «Murat qashan muratyna jetedi?» degen taqyrypta maqala jarııalanǵan bolatyn.

Murattyń jaıy egjeı-tegjeıli zerttelip, gazet be­tinde másele kóterilgennen keıin bul iske qu­zyrly oryndar da moıyn buryp, qoz­ǵal­ǵandaı bol­dy.

Nur Otan partııasynyń Qoǵamdyq qabyl­daýynyń arqasynda, Ishki ister mınıstriniń orynbasary Arystanǵalı Rasylhanulynyń qabyl­daýynda bolyp, 32 jyl boıy azamattyq ala almaı júrgen Murattyń máselesin jetkizdik. Arystanǵalı myrza bul isti birden Túrkistan oblysy Kóshi-qon basqarmasyna tapsyrdy. Sonymen qatar isti ózi de nazarda ustaıtynyn aıtty. «Qanshama jyl talaı esikti qaqtyq, eshteńe alǵa júrmegen edi.  Endi máse­le­niń ońalyp kele jatqanyn estigen Murat «Eli bar, jeri bar, azamattarynyń quqyǵyn qorǵaıtyn zańy bar órkenıetti eldiń azamaty bolatyn boldym» dep qýanǵannan kózine jas aldy», – deıdi Dúnıejúzi qazaqtarynyń qaýym­dastyǵy Aqmola oblystyq bólimshesiniń jetekshisi Altyn Mádenqyzy.

Biz osydan keıin Ishki ister mınıstrligine ha­barla­syp, istiń júzege asý barysyn suraǵan edik. Qu­zyrly orynnyń qyzmetkeri Seıtjan Sabyr­januly:

«Murattyń máselesi bizge jetti. Tanystyq. Birden AHAJ bólimine habarlasyp kórdim, qalaı qu­jat alýǵa bolady dep. Azamattyq alý úshin áýeli aza­mattyń týý týraly kýáligi kerek. Mundaı kýálik Muratta joq. Ony alýdyń eki zańdy joly bar eken. Biri – týǵan kezde beriletin perzent­hananyń anyq­tamalyǵy. Ekinshisi sot arqyly. Iaǵnı, Muratty tanı­tyn azamattardyń kýágerligi­men jáne azamat­tyń aryzymen qaralady. Murat Ózbekstannan kelgennen keıin turaqtaǵan jeri Túrkistan oblysy, Ordabasy aýdany bolǵandyq­tan, bul is Túrkistan oblysyna jiberildi», – dep is­tiń mán-jaıyn telefon arqyly túsindirdi.

Baqytbek QADYR

Sońǵy jańalyqtar