17 Qarasha, 17:11 349 0 Kólik Anar LEPESOVA

Poıyzdaǵy kórpe-tósek daýy: Tasymaldaýshy kompanııa Joǵarǵy sot sheshimin nege oryndamaıdy?

"Jolaýshylar tasymaly" kompanııasynyń basynan daý arylar emes. Jol júrý bıletin qaıtarý kezinde 1000 teńgeden ustap kelgen kompanııanyń qıturqylyǵy jýyrda áshkerelenip, quzyrly oryndar 800 mıllıon teńgeden astam aıyppul salǵan bolatyn. Bılettiń jyry bitpeı jatyp, endi poıyzdaǵy kórpe-tósektiń tóńireginde shý shyqty.

Osy aıda "Jolaýshylar tasymaly" kompanııasynyń saıtynda qyzyqty habarlamanyń sheti qylań etti. Resmı habarlamanyń maǵynasy "merdiger kompanııa standartqa saı tósek-jabdyqpen der kezinde qamtamasyz etpegeni úshin 1-20 qarasha aralyǵynda poıyzben qatynaǵan jolaýshylarǵa 300 teńgeden qaıtarylady" degenge saıady.

Kásipker, jolaýshylar poıyzdaryn on jyldan astam ýaqyt kórpe-tósekpen qamtamasyz etip kelgen "As-Aı" kompanııasynyń jetekshisi Asqar Omarov sońǵy ret tenderge bes jyl buryn qatysqanyn, jeńiske jetkenin, alaıda, ózi basshylyq etetin kompanııanyń qyzmet kórsetýden alastatylyp otyrǵanyn aıtady.

"Búginde "Jolaýshylar tasymaly" eki jaqqa aqsha tólep otyr. Sońǵy tórt jylda aıyrylǵan paıdamdy sot sheshimi boıynsha men óndirip kelemin. Meni shettetse de, shyǵyn tólep otyrǵany azdaı, tasymaldaý operatory taǵy bir merdigerge qyrýar qarjy tólep keledi. Temirjol salasynda jaǵdaı onsyz da máz emes. Alaıda, qarajatty únemdep, zań aıasynda jumys isteýdiń ornyna olar aqshany beker shashyp, bizdiń kompanııany shettetip keledi", - deıdi "As-Aı" kompanııasynyń basshysy Asqar Omarov.

Kásipker birneshe ret sotqa júgingen eken. Barlyǵyn da sot oń sheshim shyǵarǵan. Sot sheshimderi qolda bola tura, óz talabyn tolyq oryndata almaı júrgen ol prezıdent Toqaev pen ulttyq temirjol kompanııasy basshysy Myńbaevqa hat jazbaqshy.

Aıta keteıik, kir jýý kombınaty jolaýshylar poıyzdaryn tósek-jabdyqen qamtamasyz etý úshin keńes jyldary qurylǵan. Jyldar óte jabdyqtardyń tozyǵy jetip, kásiporyn satylyp ketken. "Biz ony satyp aldyq. Jańa tehnıkamen jabdyqtadyq. 150 adamdy jumysqa alyp, on jyldaı jaqsy jumys istep keldik. 2014 jyly "Jolaýshylar tasymaly" AQ "Ekspress" fılıalyna qarasty "Talgo" vagondaryn tósek-jabdyqpen qamtamasyz etýimiz kerek edi. Alaıda, tasymaldaý operatory shartty birjaqty buzyp, bir paıdamyzdan aıyryldyq. Sol úshin birneshe ret sottastyq ta. Barlyǵynda da jeńiske jettik. Alaıda, bizdiń qyzmetimizdi "Jolaýshylar tasymaly" shettetip otyr", - deıdi kásipker.

Asqar Omarov toqtap qalmaq emes. Ári qaraı da ádilet izdeıtinin jetkizdi.

"Bir túsinbeıtinim - kvazımemlekettik sektorda nelikten sot sheshimin qurmettemeıdi eken? Tasymaldaý mekemesine qatysty eki jeke sot anyqtamasy shyqty. Olar barlyǵyn retke keltirý kerek. Ol eshteńe emes, jaýapker kompanııa Joǵarǵy sottyń sheshimin de pysqyryp otyrǵan joq. Al sheshimi oryndalmaıtyn sot júıesinen bizge ne paıda?, - deıdi ol.

Esterińizde bolsa, "Jolaýshylar tasymaly" AQ salasyn retteýge taıaýda nemis azamaty Mıhael Kortıým taǵaıyndalǵan bolatyn. Shetel azamatynyń ázirge kópshilik aldyna shyǵyp, qandaı jumystar atqaryp jatqanyn aıta qoımady. Ne bolsa da, jolaýshylardyń tilegi bireý - tasymal salasynda tártip ornasa deıdi.

Sońǵy jańalyqtar