14 Qarasha, 20:40 397 0 Ádebıet Anar LEPESOVA

«Kitap oqyp, rýhanı baı bol!» baıqaýy qorytyndylandy

Aqtóbe oblysynda  «Kitap oqyp, rýhanı baı bol!» baıqaýy qorytyndylandy. «Rýhanı jańǵyrý» baǵdarlamasy aıasynda QR Aqparat jáne qoǵamdyq damý mınıstrliginiń bastamasymen uıymdastyrylǵan baıqaý 16 qazanda bastalǵan bolatyn.

Sharanyń negizgi maqsaty – «Rýhanı jańǵyrý» baǵdarlamasyn júzege asyrý, kitapqa degen qyzyǵýshylyq pen kitap oqý mádenıetin arttyrý, oqyrmandardyń shyǵarmashylyq múmkindikterin damytý, qoldaý kórsetý jáne úzdik kórkem shyǵarmalardy keńinen nasıhattaý.

Baıqaýǵa 150-deı jalpy orta bilim beretin mektep oqýshylary men kolledj stýdentteri qatysty. Birinshi kezeńi kórkem shyǵarmadan úzindilerdi mánerlep oqyp, beınejazbaǵa túsirip, áleýmettik jelilerde jarııalaý arqyly ótkizildi. Ekinshi kezeńine iriktelgen qatysýshylar kórkem shyǵarmalardan bir keıipkerdiń obrazyn somdady.

IMG_0220.JPG

Qorytyndysynda kósh ilgeri ozyp shyqqan qatysýshylar jeńimpaz atanyp, júldeli oryndarǵa ıe boldy:

I oryn – Alǵa aýdany, Toqmansaı NM, 2 synyp oqýshysy Eleýsiz Shahrızat;

II oryn – Baıǵanın aýdany, Qaraýylkeldi OM, 9 synyp oqýshysy Meırambekova Aqerke;

II oryn – Aqtóbe medıınalyq kolledjiniń 2 kýrs stýdenti Ákimaly Aınadın;

III – Alǵa aýdany, Toqmansaı NM, 3 synyp oqýshysy Ermekbaı Aqlıma;

III oryn – Oıyl agrarlyq kolledjiniń stýdenti Nýrbalıev Danııar.

«Baıqaýǵa qýana-qýana qatystym. Sebebi, men kitap oqýdy óte jaqsy kóremin. Ásirese, A.Qunanbaevtyń, M.Maqataevtyń óleńderin kóp oqımyn. Kitap oqyǵan adam bilimdi bolady. Dostarymdy kitap oqýǵa shaqyramyn», - dedi úzdik tanylǵan Eleýsiz Shahrızat.

Jeńimpazdar dıplomdarmen marapattalyp, I júldeli oryn alǵan jeńimpazǵa «Marvın» kitap dúkeninen aqshalaı sertıfıkat tabystaldy. Barlyq qatysýshylarǵa kitaptar syıǵa berilip, alǵys hattarmen marapattaldy.

«Rýhanı jańǵyrý» baǵdarlamasyn júzege asyrý aıasynda Aqtóbe oblysynda birqatar sharalar atqarylýda. «Qazaq Epos» qoǵamdyq qorynyń bastamasymen ótkizilgen «Tulpar minip tý alǵan» baıqaýynda da qatysýshylar epostyq shyǵarmalardy jatqa aıtyp, baq synaǵan bolatyn. Jastardyń ádebıetke degen qyzyǵýshylyǵyn arttyratyn mundaı sharalar áli de jalǵasyn tabady.

Sońǵy jańalyqtar