12 Qarasha, 21:19 349 0 Ekonomıka Anar LEPESOVA

Qaraǵandyda ákimdik qyzmetkeriniń salyqtyq qaryzy 65 mln teńgeden asyp jyǵylǵan

Qaraǵandylyq memlekettik qyzmetkerdiń salyqtar boıynsha qaryzy 65 mıllıon teńgeden asyp tústi, dep habarlaıdy «Habar 24».

Aýdandyq ákimdiktiń bas mamany mundaı qaryzǵa óziniń atyndaǵy jer ýchaskesi úshin batyp otyr. Atalǵan somanyń 28 mıllıon teńgesi negizgi tólemaqynyń ústinen jınalǵan aıyppul bolyp shyqty. Aıta ketý kerek, memlekettik qyzmetker osydan birneshe jyl buryn aýmaǵy 37 gektar jer ýchaskesin satyp alǵan. Qalanyń ákimshilik shekarasy keńeıtilgennen keıin salyqtyq mólsherleme kúrt ósken.

Qazir sot sheshimi boıynsha qaryz májbúrlep qaıtarylýda – shendiniń eńbekaqysynyń bir bóligi bereshekti óteýge ustalynyp otyr. Ol aıyna 8 myń teńgeni quraıdy. Budan bólek, satylymǵa boryshkerdiń menshigindegi eki avtokólik pen jer ýchaskesiniń ózi shyǵarylǵan. Biraq bulardyń sońǵysyn satý múmkin bolmady, eki rette de satyp alýshylardyń bolmaýy saldarynan, aýkıon ótkizilmeı qalǵan.

"Bul jaǵdaıdy tek jer ýchaskesin satyp, salyqtyń negizgi tólemin tolyq tóleý arqyly sheshýge bolady. Negizgi tólem 37 mıllıondy quraıdy", - deıdi Memlekettik kirister departamenti bóliminiń bas mamany Gúlnar Bekenova.

Sońǵy jańalyqtar