12 Qarasha, 09:56 291 0 Óndiris Anar LEPESOVA

Elimiz 9 aıda 42,7 mlrd dollardyń ónimin eksporttady

Qazaqstannyń 9 aıdaǵy eksport kólemi 42,7 mlrd dollardy qurady. Bul týraly búgin Úkimet otyrysynda elimizdiń 10 aıdaǵy áleýmettik-ekonomıkalyq damý qorytyndysy jaıynda baıandaǵan Ulttyq ekonomıka mınıstri Rýslan Dálenov aıtty, dep habarlaıdy QazAqparat.

«Ónerkásip óndirisi ornyqty ósý úrdisin saqtap otyr. Qańtar-qazanda ósim 3,5 paıyzdy qurady. Óńdeý ónerkásibi 3,3 paıyzǵa ósti. Ósý negizgi óńdeý salalarynda qol jetkizilgen qarqynnyń saqtalýymen qamtamasyz etildi. Olar: jeńil ónerkásip, mashına jasaý, farmaevtıka jáne sýsyndar óndirisi», - dedi Rýslan Dálenov.

Onyń aıtýynsha, munaı óndirýdi qalpyna keltirý esebinen ken óndirý ónerkásibinde ósim 3,7 paıyzǵa artty. Tústi metaldar kenin óndirýde 18 paıyz deńgeıinde joǵary ósý qarqyny saqtaldy. «Qurylys jumystary qarqyndy júrgizilýde. Ósý 12,7 paıyzdy qurady. 9,8 mıllıon sharshy metr turǵyn úı paıdalanýǵa berildi. Aýyl sharýashylyǵy salasynda mal sharýashylyǵy ónimderiniń óndirisi 3,9 paıyzǵa ulǵaıdy. Bul rette, ósimdik sharýashylyǵynyń naqty ındeks kólemi 96,8 paıyzǵa deıin jaqsardy. Nátıjesinde aýyl sharýashylyǵynda tómendeý tereńdigi 0,2 paıyzǵa deıin qysqardy», - dedi ol.

Mınıstr dereginshe, kórsetiletin qyzmetter salasynda ósim 4,4 paıyzdy qurady. Saýda kólemi 7,5, kólik – 5,6 jáne baılanys – 4,5 paıyzǵa ósti. «Qańtar-qyrkúıekte syrtqy saýda aınalymy 1,5 paıyzǵa ósip, 70,4 mıllıard dollardy qurady. Eksport kólemi 42,7 mıllıard dollar, al ımport 27,6 mıllıard dollar boldy»,- dedi R.Dálenov.

 

Sońǵy jańalyqtar