10 Qarasha, 17:02 328 0 Saıasat Anar LEPESOVA

BUU Toqaevtyń Kókjaılaý jobasyn toqtatý týraly sheshimin qoldady

Kókjaılaý jobasyn júzege asyrýǵa tyıym salý jóninde sheshim BUU tarapynan da qoldaý tapty. Bul týraly QR Prezıdentiniń baspasóz hatshysy Berik Ýálı málimdedi. 

«Jaqynda ǵana Prezıdent Qasym-Jomart Kemeluly Kókjaılaý jobasyn júzege asyrýǵa tyıym salý jóninde sheshim shyǵarǵany málim. Búginde osy mańyzdy uıǵarym óz elimizben qatar álem qaýymdastyǵynyń aıryqsha nazaryn aýdartyp otyr. Bul sheshim BUU tarapynan da qoldaý tapty. Memleket basshysynyń atyna BUU Bas hatshysynyń orynbasary, BUU-nyń Eýropalyq ekonomıkalyq komıssııasynyń atqarýshy hatshysy Olga Algaerovanyń haty kelip tústi», - deıdi Berik Ýálı óziniń paraqshasynda.

BUU-nyń mártebeli ókili Kókjaılaý shatqalyndaǵy taý-shańǵy kýrortynyń qurylysyna qatysty shyǵarylǵan sheshimge qoldaý bildiretinin jetkizgen.

«Sizdiń «barlyq sheshimderdi qabyldaý kezinde halyqtyń oı-pikirin eskerip, qoǵamdyq tyńdaýlar júrgizý kerek jáne qabyldanatyn is-sharalardyń mán-mańyzyn azamattarǵa jan-jaqty túsindirý qajet» degen sózińiz maǵan erekshe áser etti.

Bul tujyrym Qazaqstannyń ashyq jáne óz azamattarynyń belsendi róline negizdelgen sheshimder qabyldaý ustanymyn ilgeriletýge beıildiligin kórseted» - dep jazady Olga Algaerova.

Memleket basshysynyń sheshimi álem qaýymdastyǵy tarapynan «qoǵamnyń alańdaýshylyǵyn eskerip jasalǵan tıimdi uıǵarym» retinde ǵana emes, elimizdiń ekologııa salasyndaǵy halyqaralyq mindettemelerdi, sonyń ishinde Orhýs konvenııasynyń qaǵıdattaryn berik ustanýy retinde qabyldanǵany óte mańyzdy. Atalǵan halyqaralyq uıym eldiń damýyna qoldaý kórsetý úshin Qazaqstanmen tyǵyz jumys isteýge nıet tanytyp otyr.

Osy oraıda, Qasym-Jomart Toqaev qyrkúıekte ótken BUU Bas Assambleıasynyń sessııasynda sóılegen sózinde Qazaqstan elimizdegi jáne óńirdegi ekologııa máselelerin sheshý, jasyl ekonomıkany qalyptastyrý, turaqty damýdy qamtamasyz etý baǵytynda BUU-men jáne onyń qurylymdarymen jemisti yntymaqtastyqty nyǵaıta beretinine basa mán bergenin atap kórsetkim keledi.

Eske salsaq, buǵan deıin Memleket basshysy Qasym-Jomart Toqaev Kókjaılaý taý-shańǵy kýrortyna qatysty pikir bildirgen bolatyn.

Sońǵy jańalyqtar