17 Qazan, 14:43 353 0 Mádenıet Anar LEPESOVA

Qazaqsha sóılegen «Malefısenta» kórermenge jol tartty

Kúni keshe «Malefısenta: Túnek Ámirshisi» fılminiń qazaq tilindegi aldyn ala kórsetilimi ótti. Fılm «Bolashaq» korporatıvtik qory men "Meloman" kompanııasynyń bastamasymen, «Nur Otan» partııasynyń qoldaýymen «Ózińnen basta» jobasy aıasynda dýblıajdaldy. Fılm dýblıajynyń demeýshisi Eýrazııalyq Top (ERG).

Is-sharada alǵash bolyp sóz alǵan «Bolashaq» korporatıvtik qory qamqorshylyq keńesiniń qurmetti múshesi, «Nur Otan» partııasy Tóraǵasynyń Birinshi orynbasary Baýyrjan Baıbek jobanyń negizgi maqsatyna toqtaldy.

– 1993 jyldan bastap Elbasynyń Jarlyǵymen «Bolashaq» baǵdarlamasy júzege asyp keledi. Baǵdarlamanyń arqasynda qarapaıym otbasynan shyqqan kóptegen jasqa shet elderdegi aldyńǵy qatarly oqý oryndarynda bilim alýǵa múmkindik jasaldy. Osyndaı aǵylshyn, nemis, franýz jáne taǵy da basqa tilderdi meńgergen jastar halqyńa qyzmet etemin deseń aldymen óz ana tilińdi bilip, ulttyq salt-dástúr men mádenıetti boıǵa sińirý kerek ekenin jaqsy túsindi. Sondyqtan da «Bolashaq»-pen oqyǵan bir top jastyń basty maqsaty elge oralǵan soń ártúrli salada qolymyzdan kelgenshe elge qyzmet etý boldy. Bul joba osyndaı ıgi oıdan týdy, dedi Baýyrjan Baıbek.

Gollıvýd fılmderin qazaq tiline dýblıajdaý – bul birinshi kezekte, árbir qazaqstandyqtyń qazaq tilindegi sapaly kontentke qol jetkizý quqyǵy. Al Gollıvýdtyń tanymal kıno týyndylary elimizde 2011 jyldan bastap qazaqsha sóıletip kele jatqan «Ózińnen basta» jobasy kommerııalyq maqsatty kózdemeıdi. Osy oraıda, «Nur Otan» partııasy Tóraǵasynyń Birinshi orynbasary Baýyrjan Baıbek:

– Jastar memleket maǵan ne beredi dep emes, árqaıysy óz salasynda ana tiline, dástúr men mádenıetimizge degen qurmetti ózinen bastap, áreket etse, elimizdiń jetistigi eselene túspek. Halqymyzdyń rýhy berik, Táýelsiz elimizdiń erteńi jarqyn bolǵaı! - dedi Baýyrjan Baıbek.

Aıta keteıik, fılmdi dýblıajdaýǵa jobanyń demeýshisi bolyp otyrǵan Eurasian Resources Group-tyń qyzmetkerleri de qatysqan.

– Bizdiń úsh áriptesimiz kastıngten ótti. Endi olardyń daýystaryn fılmde tyńdaı alamyz. Sondaı-aq, kompanııa fılmniń dýblıajyn qarjylandyrýmen qatar, Qazaqstannyń bes qalasynda qaıyrymdylyq kórsetilimder ótkizip, oǵan balalar úıleriniń, kóp balaly jáne áleýmettik jaǵdaıy tómen otbasylardan shyqqan 500-den asa balaqaı qatysty. ERG úshin bul – memlekettik tildi damytýǵa jáne nasıhattaýǵa qosqan taǵy bir úles, –  dedi ERG kompanııasynyń ókili Talǵat Tórebekov.

Sonymen qatar, fılminiń qazaq tilindegi aldyn ala kórsetilimine óner, medıa salalary men "Bolashaq" qaýymdastyǵynyń músheleri jáne basqa da qurmetti qonaqtar qatysty.

«Malefısenta» mıstıkalyq blokbasterinde joba aıasynda Malefısentanyń rólin dybystaýǵa aıryqsha quqyqtar alynǵan. Máselen, Andjelına Djolı qazaqstandyq teatr jáne kıno aktrısasy Gúlnaz Áýesbaıdy óziniń keıipkerin dybystaýǵa jeke bekitti. Qazaq dýblıajynyń rejısseri Nazerke Lespekqyzy. Fılm kastıngine Nur-Sultan, Almaty jáne Qaraǵandy qalalarynan 40-tan astam akterler qatysqan.

2019 jyly qarasha aıynda taǵy bir qazaq tiline dýblıajdalǵan "Holodnoe serde 2"/ "Muzdy ólke 2" fılminiń premerasy kútip tur.

«Ózińnen basta» jobasyn aıasynda qazaq tiline barlyǵy 32 gollıvýdtyq týyndy dýblıajdalspa, olardyń ishinde «Kólikter 2», «Kek alýshylar: Altron dəýiri», «Batyl júrek», «Koko qupııasy», «Moana», «Malefısenta», «Aladdın», «Oıynshyqtar hıkaıasy - 4» jáne t.b. fılmder bar. Osy jobanyń arqasynda 100-den astam otandyq akterdiń daýysy "Walt Disney Pictures" daýystyq qoryna jazyldy. Qazaq tili dýblıajda túrik tilinen keıingi ekinshi túrki tili bolyp tur jáne "Walt Disney" kompanııasynyń tarıhynda 39-shy orynda.

Sońǵy jańalyqtar