17 Qazan, 12:38 348 0 Kólik Anar LEPESOVA

Esirtki qoldanyp, ishimdik ishken: Almaty kóshesinde eki adamnyń ómirin qıǵan júrgizýshi qamaldy

Almatyda BMW kóliginiń júrgizýshisi jappaı jol apatyna sebepker boldy. Oqıǵa saldarynan eki adam kóz jumdy, dep habarlaıdy Almaty qalalyq polıııa departamentiniń baspasóz qyzmeti.

Kýágerlerdiń aıtýynsha, BMW kóliginiń júrgizýshisi Seıfýllın dańǵylymen júrip bara jatqan. Ol baǵdarshamnyń qyzyl túsi janyp turǵanyna qaramastan, toqtamaı joldyń qarama-qarsy betine shyǵyp ketken. Audi kóligimen soqtyǵysty. Soqqynyń qatty bolǵany sonshalyq kólik jarnama bılbordy, jol belgisi men aǵashqa soǵyldy.
Al BMW aınalyp baryp, Subaru Forester men Toyota Carina-men soqtyǵysqan. Audi kóliginiń eki jolaýshysy oqıǵa ornynda jedel járdem qyzmeti jetkenge deıin kóz jumdy. Taǵy jeti adam zardap shekti: Audi kóliginiń júrgizýshisi men jolaýshysy, BMW júrgizýshisi men úsh jolaýshysy jáne Subaru júrgizýshisi. Olar túrli jaraqatpen aýrýhanaǵa jetkizildi. 

Kóp uzamaı tártip saqshylary apatqa kináli degen kúdikpen 20 jastaǵy jigitti ustady. Onyń esirtki qoldanyp, kólik tizginine otyrǵany belgili boldy. Munyń ústine alkogoldik ishimdik ishken.

"Bul fakt QR qylmystyq kodeksiniń 345-babynyń 4-bóligi (Kólikti basqaratyn adamnyń jol júrisi nemese kólikti paıdalaný qaǵıdalaryn buzýy, abaısyzda eki nemese odan da kóp adamnyń ólimine ákep soqqan is-áreket) boıynsha sotqa deıingi reestrde tirkeldi. BMW kóliginiń júrgizýshisi birden ustaldy", - delingen Almaty polıııa departamentiniń baspasóz qyzmeti taratqan habarlamada.

Ol ýaqytsha tergeý ızolıatoryna qamaldy. Qylmystyq istiń materıaldary qalalyq polıııa departamenti tergeý basqarmasyna berildi. Qylmystyq kodekstiń 345-babyna sáıkes, júrgizýshi 5 jyldan 10 jylǵa deıin bas bostandyǵynan aıyrylýy múmkin.

Sońǵy jańalyqtar