20 Qyrkúıek, 14:42 470 0 Mádenıet Anar LEPESOVA

Mınıstr: Mádenıet qyzmetkerleriniń jalaqysy 40 paıyz ósedi

Mádenıet jáne sport mınıstri Aqtoty Raıymqulova Almaty qalasynda zııaly qaýym ókilderimen kezdesti.

Vedomstva basshysy megapolıstegi sala qyzmetkerlerimen ótken jıynda prezıdent Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» joldaýy jaıly, onda kórsetilgen mindetterdi júzege asyrý jaıynda aıtyp berdi.

Mınıstrdiń aıtýynsha, keler jyldan mádenıet salasy qyzmetkerleriniń eńbekaqysy 40 paıyzǵa ósedi. Iaǵnı, teatr ártisteriniń ortasha jalaqysy 231 myń teńge, al, kitaphana, mýzeı jáne arhıv qyzmetkerleriniń eńbekaqysy 164 myń teńge bolady. Sóz barysynda mınıstr qazir elimizdegi eń tómengi jalaqy mádenıet qyzmetkerlerinde ekenin atap ótti. Al, salanyń damýy úshin mamandardyń áleýmettik jaǵdaıy joǵary bolǵany mańyzdy. Sondyqtan, ulttyń óneri men rýhanııatyna eńbek sińirip júrgen mádenıet qyzmetkerlerine memlekettik qoldaý arta beretinin jetkizdi.

«Mádenıet pen óner qyzmetkerleriniń jaǵdaıyn kóterý josparymyzdyń bir tarmaǵy ǵana. Qazir áleýmettik jeńildikter máselesi pysyqtalyp jatyr. Mádenıet jáne sport mınıstrligi memorandýmdar ázirlep, ákimdikterge jiberdi. Olardy oryndaý úshin áleýmettik qoldaý sharalaryn, onyń ishinde mádenıet jáne óner qyzmetkerleriniń turǵyn úı jaǵdaıyn jaqsartýdy qamtıtyn salalyq josparlar bekitiletin bolady. Jastardyń turǵyn úı alýy úshin 3 mıllıon 700 myń teńgeniń kólemindegi bıýdjettik nesıe beriledi», - dedi QR Mádenıet jáne sport mınıstri Aqtoty Raıymqulova.

Zııaly qaýym ókilderi prezıdent Joldaýyndaǵy áleýmettik máselelerdi sheshýge baǵyttalǵan bóligine rızashylyqtaryn jetkizdi. Mádenıet salasy qyzmetkerleriniń mindetti áleýmettik jeńildikterdi alý múmkindigi bilim berý jáne densaýlyq saqtaý salasy qyzmetkerlerimen teńesetini «óte oryndy jáne durys qabyldanǵan sheshim boldy» degen pikirde.

Sońǵy jańalyqtar