19 Qyrkúıek, 16:58 461 0 Nur Otan Anar LEPESOVA

Qalpyna kelgen qala: Baýyrjan Baıbek arystyqtardyń búgingi tynysymen tanysty

«Nur Otan» partııasy Tóraǵasynyń Birinshi orynbasary jumys saparymen Túrkistan oblysyna kelip, Arys qalasyn qalpyna keltirý jumystarymen tanysty. Sondaı-aq aımaqqa sapary barysynda Baýyrjan Baıbek partııanyń Túrkistan oblystyq jáne qalalyq fılıalynyń qyzmetkerlerimen, aýmaqtyq partııa fılıaldary tóraǵalarynyń birinshi orynbasarlarymen jáne óńirdegi bastaýysh partııa uıymdarynyń ókilderimen kezdesti.

Arys qalasynda bolǵan tótenshe jaǵdaıdan keıin Elbasy men Memleket basshysy qalpyna keltirý jumystary qatań baqylaýda bolatynyn aıtyp, partııaǵa naqty tapsyrmalar bergen edi. Soǵan baılanysty Baýyrjan Baıbek Túrkistan oblysynyń ákimi Ómirzaq Shókeevpen birge qalanyń Ahymbekov jáne Qudaıberdiuly kóshelerinde jarylystan zardap shekken úılerdiń ornyna salynyp jatqan kóp páterli nysandardyń qurylysymen tanysty.

Jergilikti turǵyndarmen kezdesýde partııa Tóraǵasynyń Birinshi orynbasary qurylystyń partııalyq baqylaýda ekenin aıtyp, úıdiń jyl sońyna deıin paıdalanýǵa beriletinin jetkizdi.

– Arystyqtarǵa qazaq halqynyń el bolyp kómek qolyn sozýy birligimizdiń jarqyn kórinisi. Qalany qalpyna keltirý jumystary tolyq aıaqtalǵansha biz partııalyq baqylaýdy jalǵastyramyz. Bul – Elbasy, partııa Tóraǵasy men Memleket basshysynyń tikeleı tapsyrmasy, – dedi Baýyrjan Baıbek.

Óz kezekterinde Arys turǵyndary qoldaý kórsetken barsha Qazaqstan halqy men memleketke jáne «Nur Otan» partııasyna sheksiz rızashylyqtaryn bildirdi.

Shyny kerek, alǵashynda arystyqtardyń kóńilinen ár nársege alańdaýshylyq anyq baıqalatyn. Qazir kóńilderi sabasyna túsip, jaılanǵan. Tipti olardyń erteńgi kúnge degen senimi kúsheıip, ómirge degen qulshynystary arta túskenin de ańǵarý qıyn emes.

Sondaı-aq partııa Tóraǵasynyń Birinshi orynbasary A.Qojan kóshesinde ornalasqan Ibragımovter otbasynyń úıine bardy. Atalǵan úı apat saldarynan jaramsyz dep tanylyp, qaıta salynǵan. Baýyrjan Baıbek shilde aıynyń basynda Arysqa jasaǵan saparynda da bul úıdiń jaǵdaıymen tanysyp, partııa tarapynan qoldaý kórsetiletinin aıtqan bolatyn. Sodan beri Ibragımovter otbasynda jańa baspanamen birge súıinshi surar qýanysh kóbeıip, ómirge Ilııas esimdi shekesi torsyqtaı ul kelgenin de aıta ketken jón.

Indýstrııa jáne ınfraqurylymdyq damý mınıstrliginiń málimetterine súıensek, búginde Arys qalasynda jóndeý jumystarynyń 99,3 paıyzy aıaqtalǵan. Nátıjesinde barlyq áleýmettik jáne halyqqa qyzmet kórsetý nysandary qalypty jumys istep tur.

Elbasy, partııa Tóraǵasy Nursultan Ábishuly Nazarbaev 21 tamyzda ótken partııa Saıası keńesiniń keńeıtilgen otyrysynda «Senim. Dıalog. Bolashaqqa nyq qadam – «Nur Otan» partııasynyń 7 serpini» atty partııa jumysyn júıeli jańǵyrtý baǵdarlamasyn usynyp, birqatar basymdyqtardy anyqtap bergen bolatyn. Qazirgi tańda osy baǵytta aýqymdy jumystar qolǵa alynyp, júıeli túrde júrgizilýde. Ásirese, halyqty alańdatqan áleýmettik máselelerdi oń sheshý, azamattardyń ál-aýqatyn jaqsartýǵa baǵyttalǵan memlekettik baǵdarlamalardyń tabysty ári ýaqytyly oryndalýyn partııalyq baqylaýdy qamtamasyz etý, qoǵamdy ortaq múddege jumyldyrý sııaqty ıgi isterde partııa óz belsendiligin kúsheıte tústi.

Baýyrjan Baıbek partııanyń Túrkistan oblystyq jáne qalalyq fılıalynyń qyzmetkerlerimen, aýmaqtyq partııa fılıaldary tóraǵalarynyń birinshi orynbasarlarymen kezdesýde osy máselelerge erekshe nazar aýdardy.

Osy rette aıta keter jaıt, Túrkistan oblysy partııalyq jańǵyrý jumystaryn alǵashqylardyń biri bolyp qolǵa alyp, nátıjeli júzege asyrýda. Búginde oblys ortalyǵynda Open space formatynda jumys isteıtin qoǵamdyq qabyldaý bólmesi ashyldy. Endi bul jerde oblystyq fılıal tóraǵasynan bastap barlyq memlekettik mekemeniń ókilderi turaqty qabyldaýlar ótkizip turady.

Saıası keńestiń keńeıtilgen otyrysynda Partııa Tóraǵasy basa kóńil bólgen baǵyttardyń taǵy biri bastaýysh partııa uıymdarynyń jumysyn jandandyrý ekeni belgili. Sondyqtan partııa Tóraǵasynyń Birinshi orynbasary Túrkistan oblysyna sapary kezinde «Lokomotıv» AQ «Túrkistan lokomotıv paıdalaný deposy» bazasyndaǵy «Túrkistan stansasy» bastaýysh partııa uıymynyń belsendi múshelerimen kezdesti.

Kezdesýde Elbasy men Memleket basshysy júktegen mindetterdi júzege asyrýǵa ár partııalyqtyń belsendi qatysýy kerektigi jáne bastaýysh uıymdar partııanyń ózegi ekeni sóz boldy.

Negizi 1904 jyly qalanǵan «Túrkistan lokomotıv paıdalaný deposy» temirjolda júk jáne jolaýshylar tasymalyn qamtamasyz etedi. Bul mekemede «Nur Otan»-nyń bastaýysh uıymy 2012 jyly qurylǵan. Qazirgi tańda 635 múshesi bar bastaýysh uıym aımaqtaǵy partııalyq jumystarǵa belsene qatysyp keledi. «Baqytty otbasy», «Ardagerlerdi ardaqtaıyq», «Kedergisiz keleshek», «Mektepke jol» sııaqty áleýmettik baǵyttaǵy partııalyq jobalardyń da júzege asyrylýyna atalǵan uıymnyń qosqan úlesi mol.

Sońǵy jańalyqtar