19 Qyrkúıek, 12:15 423 0 Nur Otan Anar LEPESOVA

Arystyń ajary kirdi

Judyryqtaı jumylǵan el birliginiń arqasynda Arys turǵyndary qalypty tirshilikterin jalǵastyrýda. Jańa keıipke engen qalanyń bolashaǵy baıandy bolaryna senim nyǵaıa tústi. 

«Nur Otan» partııasy Túrkistan oblystyq fılıaly Arystyń búgingi tynys-tirshiligimen tanysý maqsatynda arnaıy aqparattyq týr uıymdastyrdy. Tótenshe jaǵdaıdan keıingi 81 kúnde qala tolyqtaı ózgerip, jasara, jaınaı túsken. Jarylystan zaqym kelgen ǵımarattar tolyq jóndeýden ótken.

I.Jýrba atyndaǵy orta mektep – tótenshe jaǵdaı kezinde qatty zardap shekken áleýmettik nysandardyń biri. Qazirgi tańda atalǵan ǵımarat kúrdeli jóndeýden ótip, oqýshylarǵa bilim berýde. Jańa zamanǵa saı bezendirilgen nysanǵa demeýshiler robototehnıka kabınetin syıǵa tartqan. Urpaq tárbıesine beıjaı qaramaıtyn mektep dırektory Ábdisattar Júnisov mektepte Abaı buryshyn ashqan. Bilim ordasynyń snarıad túsip, zaqymdanǵan stadıony da búginde jańa keıipke endi. Sporttyq qural-jabdyqpen qamtamasyz etilgen stadıon men sport zaly da oqýshylarǵa erekshe tartý boldy. Munan bólek, bıologııa-hımııa, ınformatıka, fızıka jáne t.b. arnaıy kabınetteri bar úsh qabatty ǵımarattyń ishi erekshe.

113 balany aman alyp qalǵan Gaýhar Ýálıhanova basqaratyn «Altyn Tumar» balabaqshasy da kúrdeli jóndeýden ótip, 1-6 jas aralyǵyndaǵy bóbekterdi tárbıeleýde. Bul nysannyń da ishi-syrtyn jóndegen «Samuryq Qazyna» ál-aýqat qory kishkentaı sábılerdiń oıyn alańyna sapaly qural-jabdyq syılaǵan.

– Basty maqsatymyz – sábılerdi qutqarý edi. Ózimdi erlik jasadym dep oılamaımyn. Ujymdaǵy 27 qyzmetker óz otbasyn emes, bala-baqshadaǵy sábılerdiń amandyǵyn oılady, – deıdi Prezıdent qolynan «Erligi úshin» medalin alǵan balabaqsha meńgerýshisi.

Aıta keteıik, Arysta 66 áleýmettik nysan bolsa, sonyń 62-i jóndeýden ótip, 4 nysan tolyqtaı qaıta salynǵan.

Sońǵy jańalyqtar