12 Qyrkúıek, 12:01 479 0 Áleýmet Anar LEPESOVA

Almatyda mektep terezesinen sekirgen oqýshy aýrýhanaǵa tústi

Mekteptiń ekinshi qabattaǵy terezesinen qulaǵan almatylyq oqýshy aýrýhanada jatyr. Bilim berý mekemesi oqıǵanyń mán-jaıyn aıtty, dep habarlaıdy KTK arnasy.

Muǵalim úzilis kezinde balalardy synyptan shyǵaryp, kabınetti kiltpen bekitip ketken eken. Keıinirek oqýshylar aıtqandaı, bala partanyń astyna tyǵylyp qalǵandyqtan, ustaz ony baıqamapty. Synypta jalǵyz ózi qalǵan 1-synyp oqýshysy syrtqa shyqqysy kelip, ekinshi qabattaǵy terezeden sekirip ketken.

"Balalar onyń partanyń astynda tyǵylyp qalǵanyn aıtty. Jetkinshek ekinshi qabattan sekirgen. Birden dárigerlerdi shaqyrdyq. Buǵan deıin muǵalimderdiń bárine qaýipsizdik tehnıkasy erejeleri túsindirilip, olar qoldaryn qoıǵan bolatyn. Bolǵan jaıt týraly aıtyp, qaıta túsindirdik", - dedi Almatynyń №80 orta mektebiniń dırektory Aıgerim Baıekenova.

Mektep dırektorynyń aıtýynsha, balanyń ata-anasy muǵalimge kiná artyp otyrǵan joq. Pedagog jumysyn jalǵastyra beredi, biraq qatań sógis alǵan.

"Balanyń jaǵdaıy bir qalypty. Úıin saǵynady. Muǵalimge de, mektepke de shaǵymym joq. Terezeden sekirgen ózi, muǵalimniń kinási emes", - dedi oqýshynyń ákesi.

Dárigerlerdiń aıtýynsha, balaqaı kóptegen jaraqat alǵan – mıy shaıqalyp, qursaq qýysynyń aǵzalaryna zaqym kelgen, oń jáne sol jaq bilek súıegi synǵan.

"Bala oıaý, tamaǵyn ózi ishedi, sóılesedi, emdelip júr. Bir apta ishinde aýrýhanadan shyǵarsaq dep otyrmyz", - dep atap ótti Balalar jedel medıınalyq járdem ortalyǵy bas dárigeriniń orynbasary Dinmuhamed Rýzýddınov.

Sońǵy jańalyqtar