12 Qyrkúıek, 11:57 429 0 Jańalyqtar Ásel ÁNÝARBEK

«Halyq dańǵaza áńgimege ermeýi qajet»

Ótken aptada Nur-Sultan qalasyndaǵy Táýelsizdik saraıynda Memleket basshysy Qasym-Jomart Toqaevtyń qatysýymen Ulttyq qoǵamdyq senim keńesiniń alǵashqy otyrysy ótti.

Memleket basshysy Q.Toqaev: «Sońǵy ýaqytta «jer sheteldikterge satylady eken» nemese «kórshi eldiń 55 eski zaýyty kóshiriledi», «myńdaǵan sheteldik jumyskerler tartylady eken» degen sııaqty túrli qaýeset áńgimeler tarap júr. Halqymyz mundaı dańǵaza áńgimelerge ermeýi qajet. Ózderiniń kózdegen maqsattaryna jetý úshin jurttyń patrıottyq sezimderin óz múddeleri úshin paıdalana biletin adamdar osyndaı alyp-qashpa áńgimelerdi shyǵaryp júr. Bıliktiń mindeti – qoǵammen dıalog júrgizý arqyly memlekettik saıasattyń maqsatyn túsindirý. Men jerdi eshkimge bermeıtinimizdi taǵy da aıtqym keledi», – dedi. Sonymen qatar, Prezıdent saıası júıeni jańǵyrtýdy jáne kiristerdiń ádil bólinýin qamtamasyz etýi tıis áleýmettik saıasatty qaıta qaraý isin jalǵastyrý qajettigin aıtty.

Adam kapıtalyn damytý jaıynda sóz qozǵaǵan saıasattanýshy Saıasat Nurbek eń aldymen bilim alý jáne eńbek etý máselesine toqtaldy. «Birinshi másele: bilimge degen jappaı suranys joq. Jalpy ishki ónimniń azaıyp  ketkenine qaramastan, biz­de tıimsiz jumys oryndary saqtalǵan. Bilim berý  júıesi bilim ekonomıkasynyń mamandaryn áli kúnge daıyndamaı otyr.  Joǵary bilimniń buqaralyq sıpat alyp ketkenin Qasym-Jomart Kemeluly óziniń Joldaýynda da kóterdi. Joǵary bilimniń bul máselesine endi ǵana  júıeli qarap jatyrmyz. Sóıte tura, bilim berý júıesi bızneske qulaq   aspaıdy. Jumys berýshilerdiń 91 paıyzy túlekterdiń praktıkalyq bilimi  men mashyǵy joq ekenin aıtady. Dıplom ıeleriniń jartysyna jýyǵy óz  mamandyǵy boıynsha jumys istemeıdi. 25 jastan keıin bizdiń adamdar bilim  alýdy toqtatady. Biliktiligin arttyrýǵa zer salmaıdy. «Eńbek kedeıligi» degen túsinik qalyptasty. Mysaly, bizde dáriger men kólik júrgizýshisiniń  aılyqtaryndaǵy aıyrmashylyq 20 paıyzdan aspaıdy. Al AQSh-ta bul   kórsetkish – 260, Germanııada – 174, Bra­zı­lııa­da – 172 paıyz. Osylaısha, neǵurlym joǵary bilikti, shyǵyny eleýli mamandyqtarǵa suranys baıqalmaı otyr. Bul – óte kúrdeli másele», – dep atap ótti Saıasat  Nurbek.

Memleket basshysynyń Ulytaýǵa jasaǵan saparynyń tarıhı mańyzdylyǵyna aqyn Qazybek Isa toqtaldy. Taıaýda ult tarıhyndaǵy Ulytaýǵa Qasym-Jomart Toqaev Qazaqstan Prezıdenti retinde tuńǵysh sapar jasap, zııarat etip qaıtty. Eýrazııa keńistiginde erekshe zor alyp ımperııa Altyn ordanyń 750 jyldyǵyn merekeleý týraly bas­tama kótergen Memleket basshysy: «Shyńǵys hannyń úlken uly Joshynyń mazary qazaq jerinde turǵanyn búginde elimizde jáne sheteldegi jurtshylyqtyń kópshiligi bile bermeıdi. Onyń tarıhı tulǵasyna álemniń nazaryn aýdaryp, kesenesin mádenı týrızm nysanyna aınaldyrý óte mańyzdy mindet» dep atap ótti. Memleket basshysynyń Ulytaý sapary men ulaǵatty sózderi rýhymyzdy kóterip, eńsemizdi bıiktetti. Iá, Altyn ordanyń atasy Joshy hannyń tulǵasyn saqtaý túgel túrki jurtyna ortaq is», – dedi Qazybek Isa.

Aıta keteıik, Ulttyq qoǵamdyq senim keńesi úsh topqa bólinip jumys isteıdi. Ekonomıkalyq, áleýmettik jáne saıası jańǵyrý toptary eldiń sózine qulaq asyp, ol usynysty Qoǵamdyq senim keńesiniń otyrysyna shyǵarady. Keshegi ótken alǵashqy otyrystyń ózinde qoǵamda qordalanǵan birqatar máseleler ortaǵa salyndy. Endi keńes músheleri kóshpeli otyrys­tar ótkizýge nıetti. Alǵashqy otyrys aımaǵy Arys bolyp bekitildi. Al Ulttyq qoǵamdyq senim keńesiniń ekinshi otyrysy 3 aıdan keıin uıymdastyrylatyn bolady.

 

Ásel ÁNÝARBEK

Sońǵy jańalyqtar