6 Qyrkúıek, 17:15 464 0 Jańalyqtar Túrkistan Gazeti

Elordadaǵy Abaı kóshesiniń boıynan Qalamgerler alleıasy ashyldy

Búgin Nur-Sultan qalasyndaǵy Abaı kóshesiniń boıynan Qalamgerler alleıasy ashyldy.

Elordada ótip jatqan Azııa elderi qalamgerleriniń I forýmyna qatysýshy aqyn-jazýshylar Qalamgerler alleıasynyń ashylýynyń kýási boldy. Saltanatty sharaǵa qala ákiminiń orynbasary Bahtııar Máken men Qazaqstan Jazýshylar Odaǵynyń tóraǵasy Ulyqbek Esdáýlet jáne Oljas Súleımenov, Tynyshtyqbek Ábdikákimuly syndy qabyrǵaly qalamgerler qatysty.

Sharada alǵashqy bolyp sóz alǵan shahar basshysynyń orynbasary Bahtııar Máken qalany jaqsartýda budan basqa da jospardyń kóp ekenin atap ótti. Al óz kezeginde jınalǵandardy quttyqtaǵan Qazaqstan Jazýshylar odaǵynyń tóraǵasy Ulyqbek Esdáýlet Qalamgerler alleıasynyń hakim Abaıdyń atymen atalatyn kósheniń boıynan oryn tebýi tegin emes ekenin jetkizdi.

«Uly Abaıdyń kóshesiniń boıynda ornalasqan Qalamgerler alleıasymen kele jatqan aqynnyń shabyty kelip, oıynan óleńniń tógilmeýi múmkin emes. Alleıa Nur-Sultanǵa nur qosyp, turǵyndardyń júregine jyr qosa bersin», – dedi Ulyqbek Esdáýlet.

Abaı – Á. Sembınov kósheleriniń qıylysynda ornalasqan Qalamgerler alleıasy Egemen Qazaqstan kóshesine deıin sozylyp jatyr. Alleıa aýmaǵy 1,2 gektardy quraıdy. Onyń 5,7 myń sharshy metrine tas tóselse, 4,2 myń sharshy metri abattandyrylǵan. Iaǵnı 50 shyrsha egilip, 428 jaryqsham ornatylǵan. Al alleıanyń qaq ortasyna Abaıdyń sózi jazylǵan mramordan jasalǵan kitap qoıylǵan.

Sońǵy jańalyqtar