15 Tamyz 2019, 16:11 574 0 Jańalyqtar Túrkistan Gazeti

Halyqaralyq Áskerı oıyndarda Qazaqstan qorjyny úsh altyn medalmen tolyqty

Qazaqstan quramasy Halyqaralyq Armııa oıyndary sheńberinde ótkizilgen «Artıllerııalyq atys sheberleri», «Suńqar salý» jáne «Senimdi qabyldaý» saıystarynda jeńis tuǵyrynan kórinip, altyndy qanjyǵasyna baılady. Bul týraly Qorǵanys mınıstrliginiń baspasóz qyzmeti habarlady. 

Qazaq sarbazdary «Artıllerııalyq atys sheberleri» baıqaýynda alǵashqy altynyna qol jetkizdi. Jeke jarys, túngi sprınt jáne estafeta kezeńderinen turatyn saıys kúndizgi jáne túngi ýaqytta ótkizildi. Jarysqa qatysýshylar belgili bir baǵytty júrip ótip, oqshashar, avtomat jáne granata atqyshtan, sondaı-aq mınoatqyshtan oq atty. Túngi ýaqytta nysanany kózdeýge túngi kórý quraldary paıdalanyldy. Aqtyq estafetada elimizdiń mına atý boıynsha kórsetkishteri joǵary baǵalanyp, Qazaqstan quramasyna jeńis ákeldi.

Jeńiske jetý týraly «Ońtústik» óńirlik qolbasshylyǵy áskerleri qolbasshysynyń oqpen atý boıynsha orynbasary, komanda jattyqtyrýshysy, polkovnık Dáýren Esqojın: «Jeńiske birneshe aı boıy tynbaı júrgizgen daıyndyq, komandanyń úılesimdi jumysy, myqty jaýyngerlik rýh, tabandylyq pen aıqyn maqsat jeteledi. Sondyqtan bul qazaqstandyq artıllerısterdiń eńbeginiń jeńisi» deıdi.

Úzdik nátıjeni kórsetken kelesi baıqaýdyń biri – «Senimdi qabyldaý». Jarysta áskerı baılanys qyzmetkerleri radıogramma arqyly baılanysty ustap, Morze álippesimen habarlamalar jiberip, túnde jaryq berý belgilerin qalta shamy arqyly kórsetti. Al sońǵy márede saıyskerler kez kelgen tásilmen baılanysty ornatyp, qajetti dabyldy jiberýi tıis. Bul oraıda bizdiń quram birinshi kezeńde-aq birden basymdyq tanytyp, saıystyń barlyq kezeńderinde úzdik kórindi.

Elimizge taǵy bir jeńisti syılaǵan – «Suńqar salý» baıqaýy. Bul úsh kezeńnen turatyn saıys. Birinshi kezeń –   ushqyshsyz ushý aparattarynyń daıyndyǵy jáne kúndizgi áýe barlaýy, ekinshi kezeń – bıiktep ushý, áýe barlaýy jáne túnde artıllerııa oqtaryn qalypqa keltirý dep atalady. Mundaǵy sheshýshi kezeńde ár elden úsh ushqyshsyz ushý qurylǵylary alma kezek izdeý, anyqtaý jáne obektilerdiń koordınattaryn belgileý tapsyrmalaryn oryndady.

Aıta keterligi, bıyl elimizde ótken Halyqaralyq Armııa oıyndaryna Reseı, Qytaı, Belarýs, Ózbekstan, Qyrǵyzstan, Ázirbaıjan, Tájikstan, Armenııa, Iran, Sırııa, sonymen qatar Venesýela jáne Zımbabve memleketteri Qarýly Kúshteriniń áskerı sheberleri qatysty.

Atalǵan úsh baıqaýdyń jeńimpazdary men saıys júldegerlerin marapattaý 15 tamyz kúni «Otar» áskerı polıgonynda ArHO-2019 saltanatty jabylý rásimi aıasynda ótedi.

Sońǵy jańalyqtar