15 Tamyz, 17:38 445 0 Bilgenge marjan Turkystan Support

Qoǵam: aptalyq sholý

Balalar alańsyz oqysyn dep...

 Nur-Sultan

Elordada «Balany mektepke daıyndaıyq» akııasy bastaldy. Akııa «Nur Otan» partııasynyń «Baqytty otbasy» partııalyq jobasy aıasynda júzege asyrylyp otyr.

Az qamtylǵan jáne kóp balaly otbasylardan shyqqan 150 mektep oqýshysyna syılyqtar tabystaldy. Mektepke qajetti qural-jabdyqtar men sómkelerdi ata-analary partııa fılıaldaryna kómekke júgingen alǵashqy 150 bala al­dy. Elordalyq meenattarmen birge partııa músheleri 1500-den astam balany jańa oqý jylyna daıyndaýdy josparlap otyr.

«Balany mektepke daıyndaıyq» akııasy «Baqytty otbasy» partııalyq jobasy aıasynda ótkizilip kele jatqan dástúrli is-sharaǵa aınaldy. Bul ıgi is balalardy mektepke daıyndaýǵa múmkindigi kelmeıtin kópbalaly jáne az qamtylǵan otbasylarǵa kómektesýdi maqsat etedi. Bul eń jaqsy respýblıkalyq akııalardyń biri. Balalardyń bilimdi, eńbekqor, eli­miz­diń laıyqty azamattary bolýyn tileımin», – dep atap ótti «Nur Otan» partııasy Nur-Sultan qalalyq fılıaly tóraǵasynyń birinshi orynbasary Erlan Kanalımov.

Mektepke daıyndalýda kómek alǵysy keletin otbasylar partııanyń elordalyq fılıalyna, sondaı-aq jergilikti ózin-ózi basqarý organdaryna júgine alady. «Balany mektepke daıyndaıyq» respýblıkalyq akııasynyń maqsaty – qarjylyq qıynshylyqtary bar otbasylarǵa múmkindiginshe áleýmettik qoldaý kórsetý. Akııa elimizdiń barlyq aımaqtarynda ótip, osy aıdyń sońyna deıin jalǵasady.

 

Shymkent

Kópbalaly analarǵa kómek berý maqsatynda «Mektepke jol– 2019» qaıyrymdylyq akııasy bastaý aldy.

Aıtýly qaıyrymdylyq sharasynyń maqsaty – az qamtylǵan jáne kópbalaly otbasylar, jetim balalar men ata-anasynyń qamqorlyǵynsyz qalǵan balalarǵa jańa oqý jylyna daıyndyq kezeńinde kómek kórsetý jáne olardyń áleýmettik sebepter boıynsha mektepke barmaýynyń aldyn alý. Sharaǵa «Nur Otan» partııasynyń músheleri, depýtattar, bilim salasynyń qyzmetkerleri, «Jas Otan» JQ Shymkent qalalyq fılıaly, úkimettik emes uıymdar men BAQ ókilderi qatysty.

Alǵashqy quttyqtaý sózdi «Nur Otan» partııasy Shymkent qalalyq fılıaly tóraǵasynyń birinshi orynbasary  Bahadyr Narymbet aıtty. «Dástúrli túrde ótetin «Mektepke jol» respýblıkalyq akııasy aıasynda biz áleýmettik jaǵdaıy az qamtylǵan otbasylarǵa qol ushyn berip kelemiz. Búldirshinderdiń qajetti qural-jabdyqtarmen tolyqqandy qamtylmaýy – bizdiń azamattyǵymyzǵa úlken syn. Jańa oqý jylynda mektep tabaldyryǵyn attaıtyn balalardyń ishinen bolashaqta myqty maman ıeleri shyǵady dep senemin. Biz tek qana olarǵa demeý jasap, bulaqtyń kózin ashýymyz kerek. Osynaý sharaǵa frakııa músheleri men depýtattar tarapynan kórsetilgen kómekter men qoldaýlardyń úlesi zor», – dep aldaǵy jańa oqý jylyna aq jol tiledi.

Is-shara barysynda sharaǵa demeýshilik kórsetken Shymkent qalalyq máslıhatynyń depýtaty Erkin Satqanbaev árbir oqýshynyń bıyl mektepke daıyndyǵy nazardan tys qalmaý kerektigin aıtty. Akııa sheńberinde depýtattar tarapynan 60-qa jýyq balalarǵa kıim-keshek pen sómkeler taratylyp, 25 myń teńgeden qarjylaı syılyq úlestirildi.

Al akııaǵa qatysýshylardyń biri 34 jastaǵy kópbalaly ana Madına Dúısenbıeva kóp balaly otbasylarǵa balalaryn mektepke daıyndaý ońaıǵa túspeıtinin aıtty. «Men 8 balanyń anasymyn. Barlyq balamdy birdeı mektepke daıyndaý ońaı emes. Partııa uıymdastyryp otyrǵan osyndaı sharaǵa ótken jyly da qatysqan bolatynbyz. Balama sómke jáne aqshalaı syılyq berdi. Balalar da qýanyshty. Biz sııaqty kóp balaly otbasylarǵa munyń ózi úlken kómek. «Nur Otan» partııasynyń Shymkent qalalyq fılıalyna úlken alǵysymdy bildiremin», – dedi Madına Dúısenbıeva.

 

Pavlodar

Jyl saıyn respýblıkalyq «Mektepke jol» akııasy elimizdiń barlyq aımaǵynda ótkiziledi. Dástúrli túrde ótetin sharada qaıyrymdy jandar oqýshylardy jańa oqý jylyna daıarlaýǵa atsalysyp, búldirshinderge qýanysh syılaýǵa asyǵady.

Qaıyrymdylyq akııasy «Nur Otan» partııasynyń Pavlodar oblystyq fılıalynda da jalǵasyn tapty. Oǵan depýtattar, memlekettik organdar basshylary, kásipkerler jáne túrli sharýa qojalyqtarynyń basshylary belsene qatysty. Shara barysynda balalar men olardyń ata-analaryna arnalǵan merekelik konert uıymdastyryldy. Sondaı-aq kópbalaly jáne az qamtylǵan 17 otbasyǵa mektep sómkesi tabystaldy. Sómkeler árbir mektep oqýshysyna arnalǵan qajetti keńse taýarlarymen: qalamsaýyt, qalamsap, qaryndashtar, albom, kúndelik, dápterler jáne basqa da zattarmen toltyrylǵan.

«Biz ata-analarǵa balany mektepke daıyndaýǵa jan-jaqty kómektesemiz. Ásirese, «Mektepke jol» sharasyn kásipkerler qoldap otyr. Sonyń arqasynda kómekke muqtaj ata-analardyń balalaryna mektep formalary, oqýshy sómkesi, keńse taýarlary, sporttyq úlgidegi kıimder úles­ti­rilip, qosymsha materıaldyq kómek kórsetiledi», – deıdi sharany uıymdastyrýshylar.

Úsh bala tárbıelep otyrǵan Tatıana Edresheva da óz kezeginde akııany uıymdastyrýshylarǵa alǵysyn jetkizdi. «Úsh balany mektepke daıyndaıtyn ýaqytta qınalyp qalatynym bar. Osyny eskerip akııany uıymdastyrýshylar jyl saıyn bizge kómektesip keledi. Ótken jyly da osy akııaǵa qatysqanmyn. Balalaryma oqýǵa qajetti kerek-jaraqtyń bárin syıǵa tartty. Sondyqtan sharany uıymdastyrýshylarǵa aıtar alǵysym zor. Árqashan búldirshinderdiń kúlkisine kýá bop, analardyń alǵysyn alyp júre bergeısizder», – dep aǵynan jaryldy kópbalaly ana.

Aıta keteıik, «Mektepke jol» akııasy sheńberinde mektepke barmaıtyn balalardy anyqtaýǵa, mektepke daıyndaý boıynsha áleýmettik qorǵalmaǵan otbasynan shyqqan balalarǵa kómek kórsetýge de basa nazar aýdaryldy.

 

 Elge qolaısyzdyq týdyrǵan

Almaty sııaqty úlken megapolıstiń óz túıtkili jeterlik. Ásirese, qo­ǵam­dyq oryndarda tártiptiń saqtalmaýyna turǵyndardyń shaǵymy kóp. Osy aptada Almaty qalasy, Áýezov aýdanyna qarasty Aqsaı-2 yq­sham aýdanyndaǵy 16 a úıiniń birneshe turǵyny birinshi qabattaǵy dámhanalardyń zańsyz jumys istep jatqanyna narazy ekenin jetkizdi.

«Nur Otan» partııasynyń qalalyq fılıalynan kómek surap, partııanyń Áýezov aýdandyq fılıalynyń qoǵamdyq qabyldaýyna shaǵym túsirgen turǵyndar kúni boıy qýyrylǵan maı, shoshqa etinen pisirilgen káýaptyń ıisi men tútini páter ishin alyp ketetinin aıtady. Máselen, «Kontýr», «Zolotoe rýno» dámhanasynyń ústińgi qabatynda turatyn turǵyndar úshin atalǵan tamaqtaný oryndary kóp yńǵaısyzdyqtar týdyrǵan-dy.

Turǵyndar shaǵymynan keıin partııa ókilderi sol dámhanalarǵa baryp, zań buzýshylyq áreketterdiń betin ashty. Bul nysandaǵy jaǵdaıdy endi memlekettik organdar baqylamaq. Qalalyq sáýlet-qurylys basqarmasy men jer ınspekııasy dámhanalardyń áreketine zańdy túrde jaza qoldanýǵa kirispekshi.

Dámhanany aralap, turǵyndardyń muń-muqtajyn tyńdaǵan Almaty qalasy máslıhatynyń depýtaty Erbolat Qasymovtyń aıtýynsha, zań buzýshylyq kózge uryp tur. «Qalalyq sáýlet basqarmasy bar jer ınspekııasy tekserýge keledi. Zańdy túrde jaza qoldanylady. Ary qaraı bul másele partııa baqylaýynda bolmaq» dedi.

Jalpy, Áýezov aýdanynda 120 dámhana, 25-ke jýyq meıramhana qyzmet kórsetedi eken. Turǵyndar shaǵymynyń nátıjesinde bular da  tekseristen ótetin boldy.

 

Abaıdyń jyryn oqyp, shyńyna shyqty

Almaty qalasynda qazaqtyń uly aqyny Abaı Qunanbaıulynyń 175 jyldyq mereıtoıyna oraı Abaı shyńyn baǵyndyrý sharasy ótti. Sharany «Jas Otan» Jastar qanatynyń Almaty qalalyq fılıaly uıymdastyrdy.

Úsh naızatastan quralǵan Abaı shyńy 3600 metr bıiktikte qasqaıyp tur. Shyń basyna shyqqan júzdegen adam aqynnyń óleńderin oqyp, ánderin áýelete shyrqady. Ári qaraı kásibı alpınıster toby 4010 metr bıiktiktegi Abaı shyńyna kóterilip, ol jerde Qazaqstannyń jáne «Jas Otan» Jastar qanatynyń týyn kókte jelbiretti. Sharaǵa qatysyp, atsalysqandar arasynda partııa ókilderi, blogerler, sportshylar jáne ózge de erikti jastar boldy.

«Osydan 20 kún buryn shilde aıynda Abaıdyń 175 jyldyǵyn atap ótýge qandaı úles qosamyz degen oı bolǵan edi. Qazir qarap otyrsaq jastar shartty túrdegi jınalystardan, kezdesýlerden sharshady. Sondyqtan bul sharany jańa formatta, erekshe qylyp ótkizeıik dep kelistik. Bul bir jaǵynan salaýatty ómir saltyn qalyptastyrsa, ekinshi jaǵynan uly aqynymyzdyń rýhanı murasyn dáripteýdiń taptyrmas joly. Bizdiń usynysymyzdy «Tassaı», «Samal» sýlary, sondaı-aq qalalyq ákimdik pen partııa basshylyǵy da qoldady. Sharaǵa qatysýshylarǵa «Shymbulaq» ta qoldaý bildirdi. Qatysýǵa nıet bildirgender – ártúrli jastaǵy qala turǵyndary. Olar tizimge onlaın tirkeý arqyly endi. Jalpy alǵanda sharaǵa 80-ge jýyq adam qatysty. Jastar Abaı asýyna shyǵyp, «Jelsiz túnde jaryq aı», «Kózimniń qarasy» ánderin oryndaǵan kezde keremet áserde boldyq», – deıdi «Jas Otan» Jastar qanaty Almaty qalalyq fılıalynyń tóraǵasy Mádı Ahmetov.

Eske sala keteıik, Prezıdent Qasym-Jomart Toqaev aqynnyń 175 jyldyq mereıtoıyn atap ótý týraly resmı Jarlyqqa osy jyldyń 30 mamyrynda qol qoıǵan bolatyn. Almaty jastary mundaı sharalardy aldaǵy ýaqytta da jalǵastyratynyn aıtty. Olar osyndaı erekshe formattaǵy bastamalar túsi­niksiz jıyn, mánsiz is-shara men standartty jınalystardan áldeqaıda paıdaly bolatynyn dáleldedi. Taýǵa shyǵý sharasynan keıin #abaıshyńy heshtegi arqyly kóptegen qatysýshylar uıymdastyrýshylarǵa áleý­mettik jelide alǵysyn bildirdi.

 

Baspanaly bolýǵa taǵy bir múmkindik

Taldyqorǵan qalasynyń turǵyny Elvıra Týlaqbaeva «Baqytty otbasy» memlekettik baǵdarlamasy boıynsha baspanaly boldy. Ol Almaty oblysy boıynsha alǵashqy úı alǵan turǵyn bolyp tirkeldi.

«Nur Otan» partııasy Taldyqorǵan qalalyq fılıalynyń tóraǵasy Ǵalymjan Ábdiraıymov «Turǵyn úı qurylys jınaq bankine» arnaıy kelip, Elvıra Týlaqbaevany quttyqtady. «Baqytty otbasy» memlekettik baǵdarlamasyn engizgen memleketke raqmet. 2 paıyzben ıpotekalyq nesıe berý – halyqqa óte úlken kómek», – dedi Elvıra Muhtarqyzy qýanyshyn jasyra almaı.

Qazirgi ýaqytta Taldyqorǵan qalasynda baǵdarlamaǵa qatysýǵa 246 adam ótinish bildirse, olardyń 84-i komıssııalyq baıqaýdan ótken. Al qalǵan azamattar baıqaýdyń nátıjesin kútýde.

«Baqytty otbasy» memlekettik baǵdarlamasy – nesıege úı alýǵa jeńildik retinde qurylǵan baǵdarlama. Nesıe jylyna 2 paıyzdyq mólsherlememen 19 jylǵa beriledi. Alǵashqy jarna kólemi – 10 paıyz. Eger baǵdarlamaǵa qatysýǵa nıet bildirgen kópbalaly, ál-aýqaty tómen, múgedek balany asyrap otyrǵan jalǵyzbasty analar nemese ákeler alǵashqy jarnany tóleýge múmkindigi bolmaǵan jaǵdaıda ákimshilik tarapynan 1 mln teńge kóleminde turǵyn úı sertıfıkatyn alýǵa múmkindigi bar.

Alaıda olar baspanaǵa muqtaj otbasylar sanatyna jatatynyn dáleldeýi qajet. Ol úshin atqarýshy organnan kópbalaly otbasy ekenin dáleldeıtin anyqtama alyp, ony bankke tapsyrady. Bul baǵdarlamaǵa qatysýshylarǵa qoıylatyn eń basty talap – Qazaqstan turǵyn úı qurylys jınaq bankiniń salymshysy bolýy mindetti. Olaı bolmaǵan jaǵdaıda, bankten derbes shot ashýǵa quqy bar.

 

Pandýstar nege talapqa saı emes?

Qostanaı oblysynda áleýmettik álsiz toptarǵa jatatyn jandar úshin birshama is-sharalar uıymdastyryldy. Solardyń biri – reıd sharalary. «Kedergisiz keleshek» jobasy aıasynda «Nur Otan» partııasynyń Rýdnyı qalalyq fılıaly shaǵyn shahardaǵy áleýmettik nysandardyń múmkindigi shekteýli jandar úshin qanshalyqty qolaıly ekendigine baqylaý júrgizdi.

 Rýslan Baıǵanın arbaǵa tańylsa da, eshqashan qoǵamdyq bastamalardan tys qalǵan emes. Bul joly ol partııalyqtardyń muryndyq bolýymen ótkizgen reıd sharasyna qatysty. Onyń aıtýynsha, sońǵy jyldary nurotandyqtardyń kómegimen kóshelerdegi pandýstardyń sany artqan. «Partııa ókilderi joba aıasynda nysandardyń múmkindigi shekteýli jandardyń júrip-turý qolaılylyǵyn tekserý maqsatynda reıd uıymdastyrdy. Óńirde jarymjan azamattardyń erkin ómir súrýine barynsha jaǵdaı jasalyp keledi. Degenmen keıbir kásip ókilderi múgedektigi bar jandardy umytyp ketetin sııaqty», – deıdi Rýslan Baıǵanın.

Reıd toby ókilderi dúkender, dárihanalar men sýpermarketterdi tekserdi. Birqatar nysandarda esik, baspaldaq, pandýs ólshemderi arnaıy talaptarǵa saı kelmeıdi. Partııalyqtar nysan basshylaryna eskertý jasap, olqylyqtardyń ornyn toltyrý keregin basa aıtty.

«Nur Otan» partııasynyń ókilderi aldaǵy ýaqytta da  reıd sharalaryn toqtatpaıdy. Syn-eskertpeler jasalǵan nysandar taǵy bir márte tekseristen ótkiziledi.

Sońǵy jańalyqtar