19 Sáýir 2018, 00:07 1819 0 Óndiris Anar LEPESOVA

Saryaǵashta «Sol ıang» jaıqalady

Saryaǵashta bıyl boı kótergen qulpynaı jylyjaıy alǵashqy ónimin bere bastady. Bir jarym gektar alqapty alyp jatqan keshen ońtústikkoreıalyq tehnologııamen jabdyqtalǵan.

Jylyjaıda negizinen qulpynaıdyń koreıalyq jáne ıtalııalyq suryptary ósiriledi. Alǵash ret koreıalyq «Sol ıang», ıtalıandyq «Albıon», nemistiń «Karpı» jáne jergilikti «Vıktorııa» sorttary egilgen. Jergilikti sorttar jylyna bir-aq ret kóktem mezilinde ónim berse, sheteldik tuqymdar qysta da pise beredi. Búginde jylyjaı ónimderi Almaty, Taraz, Shymkent qalalaryna jóneltilýde.

Keshende koreıalyq tehnologııa qoldanylǵandyqtan, sol elden arnaıy mamandar da shaqyrylǵan. «Bizdiń qulpynaı – qystyq suryp. Jeltoqsannan bastap mamyr aıyna deıin ónim alamyz. Qys aılarynda jańa kókónister óspeıtindikten, bizdiń tátti shyrynǵa suranys joǵary. Onyń ústine koreıalyq tehnologııa da osy qystyq sortqa arnalǵan. Biz ony óz elimizde sátti iske asyrdyq. Endigi armanymyz – bolashaqta Saryaǵashty qulpynaıdyń otanyna aınaldyrý», ‒ deıdi koreıalyq maman Kım Djan Shık.

Qulpynaı ózge kókónister sııaqty jylýdy asa qajet etpeıdi. Nebary 5-6 gradýs jylýda ósip shyǵady. Al qystyń sýyǵynda 10-15 gradýstyq jylylyq jetkilikti. Saryaǵash jylyjaıynda jınalǵan qulpynaılardyń eń kishisi – 30-35 gramm bolsa, irileriniń salmaǵy 55-60 gramǵa deıin jetedi. Qazir jylyjaı qyzmetkerleri bir jarym gektar alqaptan táýligine 350-400 keli ónim jınaýda. Óńirdegi birden-bir qulpynaı ósiretin jylyjaı bolǵandyqtan, ónimge suranys ta joǵary.

Alǵashqy jyl bolǵandyqtan jylyjaı jumysynda azdaǵan qatelikter de ketipti. «Bastapqyda jylýdyń naqty mólsherin bilmegendikten, ónim josparlaǵannan azdaý bolǵaly tur», – deıdi mamandar. Jylyjaı qyzmetkerleri bıyl gektaryna 20 tonnadan qulpynaı jınamaq nıette. Al kelesi jyly ónim kólemin 40 tonnaǵa jetkizýge bekingen.

 

Sońǵy jańalyqtar