20 Qyrkúıek, 15:53 993 0 Densaýlyq Anar LEPESOVA

DDSU Eýropa elderinde koronavırýstyń órshý sebebin aıtty

Balqan elderinde jáne búkil Eýropa aýmaǵynda epıdemıologııalyq ahýaldyń ýshyǵýyna koronavırýsqa qarsy saqtyq sharalarynyń saqtalmaýy sebep.  Memleketterdiń bıligi baqylaýdy kúsheıtýi qajet. Bul týraly Dúnıejúzilik densaýlyq saqtaý uıymynyń Belgradtaǵy keńsesi málimdedi, dep jazady RIA Novostı.

Albanııa, Bosnııa men Geregovına, Slovenııa, Soltústik Makedonııa, Horvatııa, Chernogorııa jáne Kosovo respýblıkasynyń bıligi karantın sharalary jeńildetilip, shekaralar ashylǵan soń indet juqtyrǵandar men vırýstan kóz jumǵandar sanynyń kúrt óskenin aıtty.

«Balqan aımaǵyndaǵy ǵana emes, búkil Eýropa aýmaǵynda jaǵdaı qıyndap keledi. Barlyq memleketter densaýlyq saqtaý sharalaryn der kezinde qolǵa alyp, júıeli túrde áreket etýi qajet. Indet juqtyrǵandarmen baılanysta bolǵandardy oqshaýlaý, araqashyqtyq saqtaý, maska taǵý, tynys alý joldarynyń jáne qol gıgıenasyn qadaǵalaý sekildi sharalar mindetti túrde oryndalýy qajet», - deıdi DDSU ókildigindegiler.

Uıym mamandarynyń sózinshe, demalysta júrgender, túngi klýb, dinı nysandarǵa baratyndar jáne ózge de buqaralyq sharalarǵa qatysýshylardyń saqtyq sharalaryn oryndamaýy indettiń taralýyn qaıta órshitti.

Sondaı-aq, aq halattylar mektepterdiń ashylýy da úlken qaýip týdyryp otyrǵanyn aıtady. Dese de, mamandar bilim berý isin turalatpaý úshin jáne balalardy áleýmettendirip, teńsizdik máselesin joıý úshin mektepterdi ashý májbúrli qadam boldy dep esepteıdi.

Aıta keteıik, Ispanııada karantın kúsheıtildi. Indettiń taralýyn toqtatý úshin Madrıd bıligi qalanyń birneshe aýdanynda shekteý sharalaryn kúsheıtýge májbúr boldy. 850 myń adam turatyn aýdandardy qamtıtyn shekteý 2 aptaǵa sozylady. Turǵyndar úılerinen tek jumysqa, mektepke nemese dárigerge qaralý úshin ǵana shyǵa alady.

Al Ulybrıtanııada karantın talaptaryn buzǵandarǵa salynatyn aıyppul kólemi kóbeıedi.  Koronavırýs juqtyrǵany rastalǵan jáne eki aptalyq karantındi birneshe ret buzǵan azamattar kelesi aptadan bastap 10 myń fýntqa deıin (13 myń dollarǵa deıin) tólemek. Eldegi indettiń taralýyn baqylaý úshin qurylǵan Test jáne trace baǵdarlamasy qyzmetkerleriniń usynystaryna qulaq aspaıtyn turǵyndar da osynsha kólemde aıyppul arqalaıdy.

Sońǵy jańalyqtar