28 Mamyr, 11:14 403 0 Bilim Araılym Bımendıeva

Túrkistan oblysynda UBT-ǵa 18 634 túlek qatysady 

Nur Otan partııasynyń Túrkistan oblystyq fılıaly óńir turǵyndaryna arnap tikeleı efır uıymdastyrdy. Túrkistan oblystyq adamı áleýetti damytý basqarmasynyń basshysy  Raqymbek Jolaev 2019-2020 oqý jylyn qorytyndylap, bilim salasyndaǵy jańalyqtarmen bólisti.
Raqymbek Jolaevtyń aıtýynsha, pandemııa qaýpine baılanysty bıylǵy ulttyq biryńǵaı testileýinde saqtyq kúsheıtiledi.
«Ulttyq biryńǵaı testileý 20 maýsym men 5 shilde aralyǵynda ótedi. Ótkizý erejesi burynǵydaı. Degenmen ár aýdıtorııadaǵy testileýge qatysýshylar sany 2 esege azaıady. Mysaly, buryn ár partada bir túlek test tapsyrsa, endi eki metr kóleminde ara-qashyqtyq saqtalady. Barlyq test ótkizý pýnkteri jylý teksergish quraldarymen, jedel járdem pýnkterimen, dezınfekııalaý týnnelderimen, sanıtarlyq tazartqyshtarmen, respıratorlyq maskalarmen, qolǵaptarmen qamtamasyz etiledi. Sonymen birge 3-4 maýsym kúnderi sanıtarlyq talaptardy saqtaı otyryp, túlekter úshin mekteppen qoshtasý saltanatty is-sharalaryn ótkizýdi josparlap otyrmyz. Mekteptiń aýlasynda qysqa ǵana ýaqytqa sozylatyn jıynǵa synyp jetekshisi men birneshe ustaz jáne shekteýli deńgeıde ata-analar ǵana qatystyrylady. Qatysýshylar túgel maska kıip, ara-qashyqtyqty saqtaýy tıis. Túlekterdiń ómirindegi erekshe sátke arnalǵan is-shara ótýi tıis oılaımyn», – dedi ol.
Bıyl Túrkistan oblysy boıynsha  11 synypty   24 658 oqýshy bitirdi.  Koronavırýs pandemııasyna baılanysty UBT-ǵa ótinish berý rásimi onlaın jáne dástúrli túrde júrgizildi. Oblys boıynsha testileýge 24 658 bitirýshiniń 18 634-i ótinish berdi. Bul jalpy túlekterdiń 75,5 paıyzyn quraıdy. Bir aıta keterligi, ótinish berýshiler sany 7 paıyzǵa kóbeıgen. Byltyr túlekterdiń 68,8 paıyzy testileýge qatysýǵa ótinish bergen bolatyn. Iaǵnı, qaýipti indet túlekterdiń bilimge degen qulshynysyna kedergi keltire almaǵan.
Oblysta ulttyq biryńǵaı testileýdi ótkizýge arnalǵan 15 pýnkt ázirlengen. Shalǵaı aýyldarda turatyn 11 200 oqýshyny UBT ótkizý oryndaryna tasymaldaý úshin tıisti qarjy qaralǵan. Oblysta kópbalaly jáne az qamtylǵan otbasylardyń balalary úshin memleket tarapynan qosymsha granttar da qaralady. Ol úshin árbir túlek eń tómengi 50 balldan joǵary jınaýy tıis.
Basqarma basshysy oblys aýmaǵyn keń jolaqty ınternetpen tolyq qamtamasyz etý baǵytynda jumystar bastalǵanyn, eger pandemııa jalǵasqan jaǵdaıda árbir ata-ana balalaryn qajetti qurylǵylar – smartfon, planshet, noýtbýkpen qamtamasyz etýge kúsh salýlary kerektigin aıtty.
«Biz 1 qyrkúıekte dástúrli oqý júıesine kóship, oqý jylyn mektepterde qarsy alýǵa úmittenip otyrmyz. Karantın toqtasa, oqýshylarymyzdy jazǵy saýyqtyrý lagerlerine jiberýge de daıynbyz. Demalys oryndary saqadaı-saı. Biraq qaýipti indettiń taralýy toqtamasa, qashyqtyqtan oqytýǵa májbúr bolamyz», – dedi R.Jolaev.

Sońǵy jańalyqtar