27 Mamyr 2020, 14:42 1777 0 Bilim Anar LEPESOVA

JOO aqysyn tóleý úshin stýdentterge jeńildetilgen nesıe beriledi – Prezıdent

Qasym-Jomart Toqaev elimizde joǵary bilimniń qoljetimdiligin arttyrý úshin stýdentterge jeńildetilgen nesıe berýdi usyndy.

Mundaı usynysty Prezıdent Ulttyq qoǵamdyq senim keńesiniń úshinshi otyrysynda aıtty.

«Eń mańyzdy másele - joǵary bilimniń qoljetimdi bolýy. Memlekettik bilim granttaryn bólý júıesinde aýqymdy áleýmettik quramdy qarastyrý kerek dep sanaımyn. Iaǵnı, úmitkerdiń oqý jetistikterine ǵana emes, onyń áleýmettik-ekonomıkalyq jaǵdaıyna da nazar aýdarý kerek», - dedi Memleket basshysy.

Sondaı-aq, Prezıdent áleýmettik álsiz sanatqa jatatyn talapkerlerge qoldaý kórsetýdiń tetikterin jolǵa qoıý qajettigin atap ótti.

«Az qamtylǵan otbasylar úshin, azamattar men jastardyń áleýmettik álsiz sanattary úshin grant sanyn kóbeıtý máselesin qarastyrý kerek. Joǵary bilim aqysyn tóleý úshin jeńildetilgen nesıe berý - qoldaýdyń taǵy bir túri bolar edi. Úkimetten, sondaı-aq Ulttyq keńes múshelerinen osy másele boıynsha óz usynystaryn berýdi suraımyn», - dedi Q. Toqaev.

Aıta keteıik, buǵan deıin Prezıdent Úkimetke JOO oqytýshylarynyń jalaqysyn kóbeıtýdi tapsyrdy.

Sondaı-aq, Memleket basshysy ustazdardyń jalaqysyn kezeń-kezeńmen arttyryp, ýnıversıtetterdiń materıaldyq bazasyn nyǵaıtý maqsatynda elimizde grant quny 3 ese kóbeıetinin aıtty.

Sońǵy jańalyqtar