27 Mamyr 2020, 12:28 896 0 Bilim Anar LEPESOVA

Qazaqstandyq mektepterdi bir aýysymdy oqý rejımine kóshirý kerek – Raýan Kenjehanuly

Sýret ınternetten alyndy
Sýret ınternetten alyndy

Elimizde bilim berý sapasyn arttyrý úshin otandyq mektepterdi bir aýysymdy oqý rejımine kóshirý kerek. Ulttyq qoǵamdyq senim keńesiniń úshinshi otyrysynda keńes múshesi, Ulttyq aýdarma bıýrosynyń basshysy  Raýan Kenjehanuly osyndaı usynys aıtty. 

«Qazaqstanda bilim berý sapasyn arttyrýǵa basty kedergi – mektep jaǵdaıy dep oılaımyz. Naqtyraq aıtsaq, Qazaqstanǵa mektep jetispeıdi. Qazirgi tańda elimizdegi 7400 mektepte jalpy sany 3,5 mln asa bala bar. Onyń 70% - eki aýysymda, al 200 myń bala úsh aýysymda oqıdy», - dedi R.Kenjehanuly.

Spıker Qazaqstannyń ilgeri damyǵan elderdiń tájirıbesine umytylyp otyrǵanyn, alaıda mundaı memleketterdiń eshqaısysynda úsh nemese eki aýysymda oqytatyn mektep joq ekenin alǵa tartty.

«Sapaly bilim berý úshin mekteptiń bir aýysymda jumys isteýi mańyzdy. Bizdiń esebimizshe, orta bilim berý júıesin tolyqtaı bir aýysymǵa ótkizý úshin Qazaqstanǵa shamamen 3 myńdaı jańa mektep qajet», - dedi Ulttyq aýdarma bıýrosynyń basshysy.

Raýan Kenjehanuly mundaı asa aýqymdy máseleni  sheshý úshin mektep salýǵa jeke qorlardy keńinen tartýdy usyndy. Onyń aıtýynsha, qazirgi memlekettik-jekemenshik áriptestik quraly jáne bilim berýdi jan basyna qarjylandyrý tetigi mektep salýǵa jeke qarajatty, sonyń ishinde sheteldik qorlardy tartýǵa múmkindik beredi.

«Alaıda, osy atalǵan tetikter aıasyndaǵy bıznesti ekonomıkalyq turǵydan yntalandyrý sharalary jetkiliksiz. Olardy qaıta qarap, keńeıtý qajet dep sanaımyz. Sonymen birge, daǵdarystan keıingi ekonomıkany jandandyrýdyń bir amaly retinde mektep qurylysyn da qarastyrýǵa bolar edi. Aýqymdy mektep qurylysynyń ekonomıka men qoǵamǵa uzaq merzimde bereri mol ekenine senimdimiz. Tıisti esepterimiz ben naqty usynystarymyzdy Bilim jáne ǵylym mınıstrligine berdik», - dedi spıker.

Aıta keteıik, buǵan deıin Ulttyq qoǵamdyq senim keńesiniń múshesi Asylbek Qojahmetov "JOO-lardyń básekege qabilettilik baǵdarlamasyn" engizýdi usynǵanyn habarlaǵanbyz.

 

Sońǵy jańalyqtar