Атқарған жұмыс – баршаға ырыс

68 рет оқылды
0

Президент Нұрсұлтан Назарбаев «Шеврон» компаниясының директорлар кеңесінің төрағасы және бас атқарушы директоры Джон Уотсонмен кездесті. Елбасы Қазақстанның «Шеврон» компаниясының басшысымен мұнай-газ саласындағы Қазақстан ынтымақтастығын одан әрі нығайту мәселелерін талқылады.

Мемлекет басшысы мұнай-газ саласына қатысты жобаларды бірлесе іске асырудың тиімділігін айтып, Джон Уотсонға осы жұмыстарды атқаруға қосқан үлесі үшін ризашылық білдірді.

– Қазақстан «Шеврон» компаниясымен ерекше қарым-қатынас орнатты. Біз ширек ғасырдан астам уақыттан бері бірге жұмыс жасап келеміз. Бірлесе атқарған жұмыстарыңыз үшін сізге алғыс айтқым келеді. Біз сіздермен өзара тиімді ынтымақтастық орната білдік, – деді Қазақстан Президенті.

Джон Уотсон Қазақстан мен «Шеврон» компаниясының ынтымақтастық мәселелерін талқылап, оны ары қарай дамытуға қатысты пікір алмасуға мүмкіндік туғызғаны үшін Нұрсұлтан Назарбаевқа алғыс айтты.

Кездесуде Джон Уотсон Мемлекет басшысына 2018 жылдың ақпан айынан бастап, компанияның бас атқарушы директоры қызметін атқаратын Майкл Виртті таныстырды.

comments powered by HyperComments