21 Қаңтар, 21:10 869 0 Жаңалықтар Асыл ТҰМАР

Ертеректе баланың болмауы тек әйел­дер­ден деп қарайтын – бүгінде ерлердің 50-52 пайызы белсіз

Cурет дереккөзден алынды
Cурет дереккөзден алынды

Медицина ғылымдарының докторы, профессор, Алматы қаласының бас урологі Марат Мақажанов aikyn.kz сайтына берген сұхбатында ер адамдар кездесетін бедеулік пен оны емдеу жолдары туралы айтып берген.

– Скрингтік тексеру 2006 жыл­дан бастап 2016 жылға дейін жүр­гі­зілді. Осы уақыт аралығында 47 мыңға тарта ер-азамат тексеру­ден өтті. Бірінші жылдары біздің Б.Жар­босынов атындағы урология ғы­лыми орталығында ақысыз тек­серу жүргізілді. Ғылыми орта­лық осы жауапты да сауапты іс үшін Үкіметтен ешқандай қаражат ал­ған жоқ. Осы тексерулердің нә­ти­­­жесіне қарағанда, қазір еліміз бо­йын­ша еркектер белсіздігі 50-52 пайызға жетсе (белсіздіктің 3 түрі болады), бедеулік деңгейі 15 пайыздан жоғары болып тұр. Егер 15 пайыздан төмен болса, онда бұл қалыпты жағдай саналады. Ал одан жоғары болғаны – алаң­дай­тындай ахуал. Сондықтан мұның демографияға кері әсер етіп отырған жайы бар. Бұл эко­ло­гияның, ер-азаматтар өз ден­сау­лығына салғырт қарауының салдары деуге болады, – дейді маман.

Аурудың дәрежесін дәрігер анықтайды. Оны жеңіл, орташа, асқынған деп бөлуге болады. Жеңіл және орташа түрін жай ғана денешынықтыру мен салауатты өмір салтын ұстану арқылы 75 пайыз­ға дейін емдеуге болады. Сон­дықтан ауруы асқынбай, дәрі­герге неғұрлым ертерек қаралған науқастың мүмкіндігі мол екенін айтады дәрігер.

– Өкі­ніш­­ке қарай, көбі уақытты өткізіп жүріп алады да, аурудың асқынған түріне өткенде дәрігерге келеді. Бұл кезде, амал жоқ, ота жасауға мәж­бүрміз. Б.Жарбосынов атын­дағы урология орталығына келетін науқастар арасында белсіздік 30-40 жас аралығында – 15 пайыз, 40-60 жас арасында – 25-30 пайыз, 60 жастан жоғарыларда 70-80 пайызға дейін барады. Белсіздікпен келген­дер­дің 90-95 пайызын емдеуге бо­лады. Олардың 10 пайызы ота­мен, қалғаны дәрі-дәрмекпен емделеді, – дейді Марат Мақажанов.

Бедеулік жағынан алғанда шама­мен 40 пайыз – ерлер, 40 пайыз – әйелдер. Қалған 20 пайыз екеуін­де де бар болып шығатынын айтады маман.

– Ертеректе бала болмауы тек әйел­дер­ден деп қарайтын. Қазіргі статистика осындай болып тұр. Сондықтан бала сүйіп, ұрпағын өрбіткісі келсе ер-азаматтар да уақытты созбай, дер кезінде дәрігерге тексерілуі керек. Ерлі-зайып­тылар шаңырақ көтер­ген­нен кейін бір жылдың ішінде еш­­қандай сақтандыру әдістерін қол­­данбаған жағдайда бала бол­ма­­са, бұған алаңдау керек. Елде бедеулік 15-16 пайыз болса, соның бәрін емдеп шығу мүмкін емес. Шамамен, 10 пайызын емдеуге бо­лады. Туабіткен немесе тұ­қым­қуалаушылық арқылы бола­­тын бедеуліктің емделуі қиын. Олар генетиктер мен репродук­то­логтарға жүгінеді. Болмаған жағ­дайда бала сүюден үмітті ата-ана ЭКО әдісін қолданады. Қазір елімізде осы әдіспен дүние есігін ашқан сәбилер көбейіп келеді. Ең бастысы, ерлі-зайыптылар балалы болудан үмітін үзбеу керек, – дейді уролог.

Соңғы жаңалықтар