24 Сәуір 2018, 10:49 1300 0 Жаһан Анар ЛЕПЕСОВА

Сауд Арабиясының ұшақтары Йемен провинциясын атқылады

Сауд Арабиясы басқаратын коалиция ұшақтары Йеменнің солтүстігіндегі Хадджа провинциясын әуеден атқылады. Бұл туралы «Ассошиэйтед Пресс» хабарлады. 

Агенттіктің хабарлауынша, бомбалар үйлену тойы болып жатқан жерге түскен. Соққыдан 33 адам қаза тапты. 50-ден астамы жараланды. Марқұмдардың көбі әйелдер мен балалар. Жараланғандардың да 30-ға жуығы бұғанасы қатпаған жеткіншек.

Қауіпсіздік қызметкерлері ұшақтардың бір жерді екі рет атқылағанын айтады. Мәліметтерге қарағанда, өткен сенбі, жексенбі күндері коалиция ұшақтары Йеменге үш рет соққы жасады. Оның бірі дәл осы провинциядағы тұрғын үйдің үстіне түсіп, бір отбасының 5 бірдей мүшесі мерт болды. Айта кетейік, Йемендегі қақтығыстар басталған үш жылдың ішінде 10 мыңдай тұрғын қаза тапты. 3 мың адам бас сауғалап босып кетті. Біріккен Ұлттар Ұйымының есебі бойынша, бүгінде елде қалған тұрғындардың 80 пайызы гуманитарлық көмекке мұқтаж.

Соңғы жаңалықтар