11 Тамыз, 17:50 429 0 Аймақ Анар ЛЕПЕСОВА

Павлодар облыстық сотының төрағасы тағайындалды

Мемлекет басшысының Жарлығымен Бақытжан Қараманов Павлодар облыстық сотының төрағасы болып тағайындалды. Бұл туралы өңір әкімінің баспасөз қызметі хабарлады.

Жаңа басшыны Павлодар облысының құқық қорғау блогы өкілдеріне өңір әкімі Әбілқайыр Сқақов таныстырды. Әкім Бақытжан Қарамановтың сот жүйесіндегі үлкен тәжірибесін атап өтіп, жаңа жұмысына сәттілік тіледі.

«Сот жүйесінің жұмысы бүкіл қоғам үшін аса маңызды. Сот және құқық қорғау органдарының да, жалпы мемлекеттік аппараттың да басым міндеттерінің бірі тұрғындардың сенімі болып табылады. Сіздің мол жұмыс тәжірибеңіз Мемлекет басшысының сот жүйесіне жүктеген міндеттерді шешуге ықпал ететініне сенімдімін», - деді өңір басшысы.

Бақытжан Қараманов жаңа қызметіне дейін бес жыл Алматы қалалық сотында - қылмыстық істер жөніндегі сот алқасының төрағасы және судья қызметін атқарды. Оның алдында, яғни 2002-2015 жылдар аралығында әскери соттың судьясы болған.

Әр жылдары ҚР Қарулы Күштері Әскери сотында, ҚР Бас прокуратурасының әскери прокуратуралар басқармасында, ішкі әскерлердің әскери прокуратурасында және тағы басқа лауазымдарда болған.

 

Соңғы жаңалықтар