25 Наурыз 2020, 17:38 1545 0 Жаңалықтар Асыл ТҰМАР

Төртінші тоқсан: «Балапан» мен «Ел Арнадан» аптасына бес күн сабақ өтеді

Сурет ғаламтордан алынды
Сурет ғаламтордан алынды

ҚР Білім және ғылым вице-министрі Шолпан Каринова Facebook парақшасында елімізде қашықтықтан оқыту жүйесін ұйымдастыруды жобалау кеңсесі құрылып жатқанын жазды. 

Ведомство өкілінің айтуынша, Білім және ғылым министрлігінде, аймақтық білім беру басқармаларында Қашықтықтан оқыту жүйесін ұйымдастыру бойынша жобалау кеңсесі құрылып отыр. Бұл ретте індет кезеңінде оқу үрдісін ұйымдастыру бойынша уақытша шаралар енгізген көршілес елдердің тәжірибесі, халықаралық тәжірибе зерделенді. Мектептер мен ұстаздар үшін тиісті ұсынымдар дайындалды. Ұстаздар үшін арнайы онлайн, теле-курстар, вебинарлар әзірленді.

«Бұған қоса, ұстаздар мен балаларға «Балапан» және «Ел Арна» телеарналарында төртінші тоқсан басталысымен күнде 1-11 сынып оқушыларына аптасына бес күн сабақ өткізіледі. Қазір осы теле-сабақтардың арнайы түсірілімі жүргізілуде. Ол сабақтар мемлекеттік стандарт талаптарына, оқу бағдарламаларына сәйкес құрылған. Оқушылар үшін 2 мыңнан астам теле-сабақ дайындалады. Бұған үлкен күш жұмсалуда», – деді вице-министр.

Оның атап өтуінше, теле-сабақ барысында Нұр-Сұлтан қаласының, Назарбаев Зияткелік мектептерінің, республикалық, халықаралық және жеке мектептердің үздік ұстаздары еліміздің барлық балаларына сабақ береді.

«Ұстаздарға тек қолдау қажет. Ұстаздар мен оқушыларға білім әлемінде жаңа асуларды меңгеру жолында табыс тілейміз», – деді Шолпан Каринова.

Соңғы жаңалықтар